Koronavırýs juqtyrǵan áıel «Sharbaqty» beketinen ótýge árekettengen

PAVLODAR. QazAqparat – Pavlodar oblysynda memlekettik shekara arqyly ótetin tórt avtokólik ótkizý pýnktindegi adamdardyń qozǵalysyn baqylaý jalǵasýda, dep habarlaıdy QazAqparat Pavlodarnews.kz saıtyna silteme jasap.

Sanıtarlyq-epıdemıologııalyq baqylaý departamentiniń málimetinshe, sońǵy táýlikte shekaradan 639 adam ótken, onyń 294 -i jaıaý, 345-i júk kóliginiń júrgizýshileri. 6 qazaqstandyq karantındik statsıonarǵa jatqyzyldy.
- «Sharbaqty» tekserý-ótkizý beketinde Pavlodar qalasynyń turǵynynda qaýipti indet rastalǵan bir jaǵdaı anyqtaldy, - delingen habarlamada.

Sondaı-aq, TMD-nyń bes azamatyna elge kirýge tyıym salyndy, onyń ishinde PTR testiniń teris nátıjesin kórsetetin sertıfıkattardy bermegen 3 Reseı Federatsııasy men Ózbekstannyń eki azamaty bar.
Aıta keterligi, shekteýler engizilgennen beri oblysqa 200,1 myń adam keldi, onyń 104,8 myńy halyqaralyq tasymaldaýdy júrgizetin júrgizýshiler jáne 95,3 myń jolaýshy. 41,5 myń PTR zertteýi júrgizildi, aýrýdyń sımptomsyz aǵymymen 265 syrttan engizilgen jaǵdaı anyqtaldy.