Koronavırýs juqtyrǵan almatylyq áıel qylmystyq jaýapkershilikke tartyldy
NUR-SULTAN. QazAqparat - Almatyda koronavırýspen aýyrǵan áıel ózimen baılanysta bolǵan adamdar týraly málimet berýden bas tartqany úshin qylmystyq jaýapkershilikke tartyldy, dep habarlaıdy QazAqparat tilshisi.
«Almaty qalalyq polıtsııa departamenti koronavırýspen aýyrǵandardyń biri - azamatsha B-nyń sanıtarlyq qyzmet jumysyna kedergi keltirip, vırýsqa shaldyqqannan keıin ózimen baılanysta bolǵan azamattardyń málimetterin berýden qasaqana bas tartqanyn habarlaıdy. Áıel QR Qylmystyq kodeksiniń 304-babynda (Sanıtarlyq erejeni nemese gıgıenalyq normatıvterdi buzý) kózdelgen qylmystyń belgileri boıynsha qylmystyq jaýapkershilikke tartyldy», - dep atap ótedi qalalyq polıtsııa departamentinen.
Almaty qalalyq polıtsııasy oryn alǵan kúrdeli jaǵdaıǵa baılanysty azamattardy qalalyq qyzmetterge koronavırýs ınfektsııasyn anyqtaý jáne aldyn alý boıynsha barynsha járdem kórsetýge jáne júrgizilip jatqan sharalarǵa túsinistikpen qaraýǵa shaqyrady.
Aıta keteıik, Memleket basshysy Qasym-Jomart Toqaev Qazaqstan Respýblıkasynda 2020 jylǵy 16 naýryzdaǵy 08 saǵat 00 mınýt pen 2020 jylǵy 15 sáýirdegi 07 saǵat 00 mınýt kezeńinde tótenshe jaǵdaı engizý týraly Jarlyqqa qol qoıdy.
Jarlyqqa sáıkes, medıtsınalyq tekserýden jáne emdelýden, karantındik rejımdi saqtaýdan bas tartatyn, epıdemıologııalyq jaǵdaıdy aıqyndaý úshin mańyzy bar derekterdi jasyratyn adamdarǵa baqylaý, sondaı-aq atalǵan adamdardyń jaýaptylyǵynyń sharalary kúsheıtiledi.
