Koronavırýs juqtyrǵan aqtóbelikke qatysty qylmystyq is qozǵalýy múmkin
AQTÓBE. QazAqparat – Aqtóbede taǵy da eki adamnan indet anyqtaldy. Al baılanysta bolǵan adamdaryn jasyryp qalǵan aqtóbelikke qatysty qylmystyq is qozǵalýy múmkin, dep habarlaıdy QazAqparat tilshisi.
Aqtóbe oblysynda keshe 1 adamnan, búgin tańerteń taǵy 1 adamnan koronavırýs ınfektsııasy anyqtaldy. Qazir barlyǵy 13 adamnyń indet juqtyrǵany belgili.
«Búgin saǵat 8:35-de bir adamnan indet anyqtaldy. Ol buryn koronavırýs juqtyrǵan adammen baılanysta bolǵan. Qazir barlyǵy 13 adam tizimge ilindi. Keshe jáne búgin tirkelgen derekke toqtalsam, olar 2 sáýir kúni aýyryp, jeke emhanaǵa barǵan er adammen baılanysta bolǵan. Sol er adam týysynyń úıine barǵanyn, oǵan zat qaldyrǵanyn bizden jasyryp qaldy. Qylmystyq kodekstiń «Adamdardyń ómirine nemese densaýlyǵyna qaýip tóndiretin mán-jaılar týraly aqparatty jasyrý» baby boıynsha materıal jınaqtalyp, quqyq qorǵaý organdaryna jiberiledi. Eger onyń kinási dáleldense, jaýapqa tartylady. Sonymen birge juqtyrǵan adamy kóz jumsa, 5 jyldan 10 jylǵa deıin bas bostandyǵynan aıyrylýy múmkin», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva. Qazirgi kezde sońǵy tirkelgen naýqas turǵan úıdiń podezi karantınge jabyldy. Dezınfektsııalaý jumysy júrgizildi. Barlyǵy 28 adam baqylaýǵa alynyp, qarym-qatynasta bolǵan 6 adam oqshaýlandy.
Aıta keteıik, vırýs juqtyrǵan aqtóbelik birneshe ret azyq-túlik sýpermarketine barǵan. Oblystyq taýarlar men kórsetiletin qyzmetter sapasy men qaýipsizdigin baqylaý departamenti ony karantınge jabýǵa sheshim qabyldady. Sonymen birge saýda ornynyń jumysshylary da úıdegi karantınde bolady.
«Aqtóbe qalasynda karantın rejımi jalǵasady. Barlyq shekteýler óz kúshinde. Qandaı da bir qajettilik bolmasa, dalaǵa shyǵýǵa bolmaıdy. Úıden jumysqa, jumystan týra úıge barý qajet. Dárihanaǵa barsa da birden úıine oralǵany durys», - deıdi Nursulý Berkimbaeva.
