Koronavırýs juqtyrǵan adam ne isteý kerek
NUR-SULTAN. QazAqparat –Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova koronavırýs ınfektsııasyn juqtyrǵan adamdar birinshi kezekte ne isteý kerektigin túsindirdi, dep habarlaıdy QazAqparat tilshisi.
«Taǵy da eske salyp óteıin, eger koronavırýs ınfektsııasyna tapsyrǵan analızden indet anyqtalsa, onda úıde oqshaýlaný kerek. Osy oraıda maska taǵý rejımin saqtap, kúnine úsh márte termometrııa júrgizý qajet. Sonymen qatar, jeke gıgıenanyń barlyq sharalaryn oryndap, jeke ydystardy paıdalanyp, bólmeni jeldetken durys», - dedi S. Qısyqova Ortalyq kommýnıkatsııalar qyzmetinde.
Onyń sózine qaraǵanda, dene qyzýy 38 gradýstan joǵary bolsa, 500 mıllıgramnan paratsetamol jáne kúnine bir ret aspırın (150 mıllıgram) qabyldaý kerek.
Sáýle Qısyqovanyń aıtýynsha, 3-5 kún aralyǵynda dene qyzýynyń kóterilýi kornavırýs ınfektsııasy qalypty dárejede ótip jatqanda baıqalady.
«Aýmaqtyq tirkelý jerine qaraı jedel járdim nemese emhananyń call-ortalyǵyna habarlaý kerek. Osy oraıda karantın jaıynda jáne ne sebepti habarlasqanyńyzdy eskertý qajet», - dedi ol.
Osy oraıda S. Qısyqova qarttar, júrek-qan tamyry ári onkologııalyq aýrýy barlar, transplantatsııalaýdan ótken turǵyndar ózderin emdeýmen aınalyspaı, birden ýchaskelik dárigermen baılanysqa shyǵýy kerektigin eskertti.
