Koronavırýs juqtyrǵan 7 myńnan astam medqyzmetker tólem aldy
Sondaı-aq, MÁSQ aýrýdyń saldarynan qaıtys bolǵan 182 medıtsına qyzmetkeriniń týystaryna tólemder aýdardy.
Tólem tólenetin medıtsına qyzmetkerlerin óńirlerdiń jáne respýblıkalyq mańyzy bar qalalardyń densaýlyq saqtaý basqarmalary janyndaǵy arnaıy komıssııalar aýyrǵan medıtsına qyzmetkerlerin tekserý nátıjeleri negizinde anyqtaıdy. Ótinimderdi jınaqtaýdy QR Densaýlyq saqtaý mınıstrligi júzege asyrady, odan keıin ótinimder elektrondyq is maketterin qalyptastyrý úshin «Azamattarǵa arnalǵan úkimet» memlekettik korporatsııasy» KEAQ-qa beriledi, sodan soń tólem taǵaıyndaý úshin MÁSQ-ǵa jiberiledi.
16 qazan saǵat 9.00-degi jaǵdaı boıynsha MÁSQ COVID-19 nemese vırýstyq pnevmonııa juqtyrǵan 7 688 medıtsına qyzmetkeriniń ótinishi boıynsha jáne aýrýdyń saldarynan qaıtys bolǵan 182 medıtsına qyzmetkerine qatysty aqshalaı qarajatty taǵaıyndaý men tóleýdi júzege asyrdy. Osylaısha, tólemderdi COVID-19-ben kúreste qaıtys bolǵan barlyq medıtsına qyzmetkerleriniń týystary aldy.
Óńirler bólinisinde medıtsına qyzmetkerlerine COVID-19 nemese vırýstyq pnevmonııany juqtyrý jaǵdaıyna tólemderdiń eń kóp sany Nur-Sultan (1246) jáne Almaty (863) qalalary jáne Atyraý (645), Qaraǵandy (552), Shyǵys Qazaqstan (542) jáne Aqmola (501) oblystary boıynsha júrgizildi.
Esterińizge sala keteıik, QR Eńbek jáne halyqty áleýmettik qorǵaý mınıstri men QR Densaýlyq saqtaý mınıstriniń 9 sáýirdegi «Densaýlyq saqtaý uıymdarynyń COVID-19 koronavırýstyq ınfektsııasyna qarsy kúres jónindegi epıdemııaǵa qarsy is-sharalarǵa tartylǵan qyzmetkerleri atalǵan ınfektsııany juqtyrǵan nemese odan qaıtys bolǵan jaǵdaıda olarǵa birjolǵy áleýmettik tólemdi júzege asyrý qaǵıdalaryn bekitý týraly» birlesken buıryǵyna aǵymdaǵy jyldyń 22 shildesinde engizilgen ózgeristerge sáıkes, joǵaryda kórsetilgen tólem:
– koronavırýstyq ınfektsııa nemese vırýstyq pnevmonııa juqtyrǵan medıtsına qyzmetkerlerine – 2 mln teńge;
– COVID-19 koronavırýstyq ınfektsııasyn juqtyrǵannan, vırýstyq pnevmonııamen aýyryp qaıtys bolǵan jaǵdaıda olardyń otbasyna – 10 mln teńge kóleminde tólenedi.