Koronavırýs juqtyrǵan 45 balanyń tórteýi jazylyp shyqty
NUR-SULTAN. QazAqparat – Qazaqstannyń memlekettik bas sanıtarlyq dárigeri Aıjan Esmaǵambetova Qazaqstanda koronavırýs juqtyrǵan 45 balanyń tórteýi jazylyp shyqqanyn málimdedi, dep habarlaıdy QazAqparat tilshisi.
«Qazaqstanda koronavırýs juqtyrǵan adamdardyń ishinde 45-i balalar. Olardyń tórteýi aýrýhanadan jazylyp, shyǵyp qoıǵan. Qalǵandarynyń jaǵdaıynyń dárejesi jeńil dep baǵalanyp otyr», - dedi Aıjan Esmaǵambetova OKQ-da ótken baspasóz máslıhatynda.
Aıjan Esmaǵambetova sonymen qatar koronavırýs ınfektsııasyn anyqtaý boıynsha Nur-Sultan men Almaty qalalarynda ekspress testten kimderdiń ótetinin aıtty.
«Qazirgi tańda elge 96 myń test jetkizildi. Ekspres testter Nur-Sultan men Almaty qalalarynda júrgiziledi. Táýligine 500-den 1000-ǵa deıin test júrgizý josparlanǵan. Sonymen qatar meniń qaýlymmen ekspres testten ótetin adamdardyń sanaty belgilendi. Olar: jedel járdemniń medıtsınalyq qyzmetkerleri, JRVI belgileri bar aýrýhanaǵa jatqyzylmaǵan adamdar, koronavırýs juqtyrǵan adammen edáýir qarym-qatynasta bolǵan adamdar, sondaı-aq ótkizý beketteri arqyly avtoótkelder men temirjol ótkelderimen kelgen azamattar, tótenshe jaǵdaıda jumys istep júrgen jergilikti atqarýshy organdardyń qyzmetkerleri», - dedi ol.
