Koronavırýs juqtyrǵan 17 adam aýyr jaǵdaıda jatyr - DSM
«Qazir statsıonarlyq emdi 712 patsıent qabyldap jatyr. Almatyda jatqan patsıentterdiń biriniń jaǵdaıy asa aýyr. 17 naýqastyń jaǵdaıy aýyr. 107 naýqas aýyrlyǵy ortasha deńgeıde jatyr. Biraq koronavırýs juqtyrý jaǵdaılarynyń 80 paıyzynda – 587 naýqas sımptomsyz nemese aýrýdy jeńil kótergender», - dedi Densaýlyq saqtaý mınıstrliginiń jaýapty hatshysy Botagóz Jaqselekova OKQ-da ótken baspasóz máslıhatynda.
Mınıstrlik ókiliniń aıtýyna qaraǵanda, osyǵan deıin koronavırýs ınfektsııasyn juqtyrǵan azamattarmen baılanysta bolǵan 21 myńǵa tarta azamat anyqtalǵan.
«Olardyń 99 paıyzy anyqtalyp, tabylyp, oqshaýlandy. Aýrýdyń tirkelý qarqyny búkil elde karantın tártibi engizilgeli beri 29 naýryzdaǵy 29 paıyzdyq deńgeıdegi jaǵdaımen salystyrǵanda 7 paıyzǵa deıin tómendedi. Bul jaǵdaı qatań karantın sharalarynyń tıimdiligin kórsetedi», - dedi ol.
Botagóz Jaqselekova keıingi kúnderi Nur-Sultan men Almaty qalalarynda koronavırýs juqtyrý jaǵdaılarynyń aıtarlyqtaı tómendegenin jetkizdi. Bul da shekteý sharalarynyń kúsheıtilýimen tikeleı baılanysty bolyp otyr.