Koronavırýs juqtyrǵan 112 medıtsına qyzmetkerine birjolǵy tólem taǵaıyndaldy – mınıstrlik

NUR-SULTAN. QazAqparat - Koronavırýs juqtyrýyna baılanysty 112 medıtsına qyzmetkerine birjolǵy tólem taǵaıyndaldy. Bul týraly QazAqparat Eńbek mınıstrligine silteme jasap habarlaıdy.

24 shilde saǵat 18.00-degi jaǵdaı boıynsha COVID-19-pen kúreske tartylǵan 112 medıtsına qyzmetkerine Memlekettik áleýmettik saqtandyrý qorynan (budan ári – MÁSQ) koronavırýstyq ınfektsııany nemese vırýstyq pnevmonııany juqtyrýyna baılanysty 2 mln. teńge mólsherinde birjolǵy áleýmettik tólem taǵaıyndaldy. Aqshalaı qarajat qazirdiń ózinde 73 medıtsına qyzmetkerine aýdaryldy, taǵy 39-yna tólemge jiberildi.

Joǵaryda kórsetilgen tólemaqy alýǵa quqyǵy bar medıtsına qyzmetkerlerin oblystardyń jáne respýblıkalyq mańyzy bar qalalardyń densaýlyq saqtaý basqarmalaryndaǵy arnaıy komıssııalar aýrý juqtyrýyn tekserý nátıjeleri boıynsha anyqtaıdy. Barlyq ótinimderdi Qazaqstan Respýblıkasy Densaýlyq saqtaý mınıstrligi (budan ári – DSM) jınaqtaıdy.

DSM-den MÁSQ-ǵa tólemge barlyǵy 123 ótinim kelip tústi. Óńirler boıynsha eń kóp ótinimder Almaty qalasynan (46), Almaty (38) jáne Soltústik Qazaqstan oblystarynan (10) kelip tústi.

Qalǵan 11 ótinim boıynsha derekterdi DSM qosymsha tekserýde. Naqtylanǵan málimetterdi usynǵannan keıin bul medıtsına qyzmetkerlerine dereý tólem taǵaıyndalady.

Esterińizge sala keteıik, QR Eńbek jáne halyqty áleýmettik qorǵaý mınıstri men QR Densaýlyq saqtaý mınıstriniń 9 sáýirdegi «Densaýlyq saqtaý uıymdarynyń COVID-19 koronavırýstyq ınfektsııasyna qarsy kúres jónindegi epıdemııaǵa qarsy is-sharalarǵa tartylǵan qyzmetkerleri atalǵan ınfektsııany juqtyrǵan nemese odan qaıtys bolǵan jaǵdaıda olarǵa birjolǵy áleýmettik tólemdi júzege asyrý qaǵıdalaryn bekitý týraly» birlesken buıryǵyna aǵymdaǵy jyldyń 22 shildesinde engizilgen ózgeristerge sáıkes joǵaryda kórsetilgen tólem:

– koronavırýstyq ınfektsııa nemese vırýstyq pnevmonııa juqtyrǵan medıtsına qyzmetkerlerine – 2 mln. teńge;

– COVID-19 koronavırýstyq ınfektsııasyn juqtyrǵannan, vırýstyq pnevmonııamen aýyryp qaıtys bolǵan jaǵdaıda olardyń otbasyna – 10 mln. teńge kóleminde tólenedi.

Koronavırýstyq ınfektsııadan, vırýstyq pnevmonııadan medıtsına qyzmetkeriniń qaıtys bolý jaǵdaılary boıynsha MÁSQ-qa ótinimder túsken joq.