Koronavırýs: JOO professorlary men rezıdentteri aýrýhanalarda jumys isteıdi
AQTÓBE. QazAqparat – Aqtóbe oblysynda medıtsınalyq kolledj túlekteri jedel járdem brıgadalaryna kómektesetin bolady. Al ýnıversıtettiń oqytýshy-professorlary men rezıdentteri aýrýhanalarǵa jiberiledi, dep habarlaıdy QazAqparat tilshisi.
Aqtóbe oblysynda qazir 4800-den astam medtsına qyzmetkeri jumys isteıdi.
«Medıtsına ýnıversıtetiniń 112 rezıdenti men 165 oqytýshy-professory emdeý, keńes berý jumysyna tartylady. Sonymen birge búginnen bastap jedel járdem men provızorlyq emdeý ornyna medıtsınalyq kolledjdiń 100-ge jýyq túlegi qosyldy», - dedi oblys ákimi Ońdasyn Orazalın.
Óńir basshysy tikeleı efır kezinde dári-dármekpen qamtamasyz etý úshin josparly tolyqtyrý júrgenin, demeýshiler arqyly qor jınalatynyn aıtty.
«Oblys boıynsha 200-ge jýyq monıtorıng toby quryldy. Olar 4 myńnan astam tekserý júrgizdi. Turǵyndar tarapynan suranys artqan soń qyzý túsiretin dári, antıbıotıkter, vırýsqa qarsy preparattardyń jetispeýshiligi bar. Ony bilemin. Oblystaǵy 573 dárihanaǵa dári-dármek ýaqylyty kelse de, turǵyndardy tolyq qamtamasyz ete almaı otyr. Dárihana ıelerine eskertý berildi. Sonymen birge kórshiles Reseımen baılanys ornatyldy», - dedi Ońdasyn Orazalın.
Buǵan deıin Óńir basshysy tikeleı efır barysynda koronavırýs boıynsha ahýaldy baıandady. Sondaı-aq ol óńirde pnevmonııadan 62 adam kóz jumǵanyn málim etti.
