Koronavırýs: «Jasyl» aımaqtaǵy Atyraý oblysynda bir kúnde 6 adam qaıtys boldy
Oblystyq densaýlyq saqtaý basqarmasy baspasóz qyzmetiniń málimetine súıensek, ótken táýlikte 39 adam Covid-19 ınfektsııasyn juqtyrǵan. Ásirese, Atyraý qalasy qaýipti vırýstyń eń kóp taralatyn oshaǵy bolyp otyr. Shaharda 29, Jylyoı aýdanyndaǵy Teńiz ken ornynda 3 naýqas anyqtalǵan.
Sondaı-aq, Qyzylqoǵa aýdanynda – 2, Mahambette – 2, Jylyoıda – 1, Isataıda – 1, Qurmanǵazy aýdanynda 1 adamnan koronavırýs ınfektsııasynyń belgisi tabylǵan.
«Ótken táýlikte qaýipti vırýs juqtyrǵan 6 adam qaıtys boldy. Al, 14 adam emdelip shyqty. Qazir 364 adam úı jaǵdaıynda emdelý úshin oqshaýlandy. Infektsııalyq statsıonarlarda 226 naýqas em qabyldap jatyr. Onyń ishinde modýldik aýrýhanada – 80, №2 oblystyq aýrýhanada – 50, aýdandardaǵy ınfektsııalyq statsıonarlarda – 35, Teńiz ken ornyndaǵy statsıonarda 61 patsıent em-dom sharasyn qabyldap jatyr» -dep habarlady basqarmanyń baspasóz qyzmeti.
Eske sala ketelik, buǵan deıin Atyraý oblysy «jasyl» aımaqqa ótkenin jazǵan edik.