Koronavırýs: jańa mýtatsııa vaktsınanyń tıimdiligin on esege tómendetedi

Qaýipti mýtatsııa

Kembrıdj ýnıversıtetiniń ǵalymdary E484K dep atalǵan B.1.1.7 brıtandyq shtammnyń 11 mýtatsııalaný jaǵdaıyn anyqtady. Ol koronavırýstyń Ońtústik Afrıka men Brazılııada tez taralýyna ákep soǵýda.

BioNTech/Pfizer vaktsınasyn alǵan adamdardyń qanyndaǵy antıdene kórsetkendeı, bul vaktsına E484K mýtatsııaly vırýsqa qarsy 10 ese tıimsiz bolyp shyqty.

Ulybrıtanııanyń densaýlyq saqtaý mınıstri Mett Henkok Brıstol men Lıverpýlde mýtatsııalanǵan jaǵdaılar anyqtalǵanyn rastady. Endi osy aýdandarda jappaı testileý ótkiziledi.

Sondaı-aq Brıtanııada vaktsınanyń alǵashqy dozasyn 10 mln adam aldy. Ǵalymdar vaktsına jańa mýtatsııaǵa qarsy tıimdi bolmasa da, vaktsınatsııa baǵdarlamasy indetke shaldyǵý jáne ólim jaǵdaıyn aıtarlyqtaı tómendetýge kómektesetinine senimdi.

Qańtarda AQSh-ta ólim jaǵdaıy rekordtyq kórsetkishke jetti

Sársenbi kúni AQSh-tyń Aýrýlardy baqylaý jáne aldyn alý ortalyǵynyń dırektory Roshel Valenskı koronavırýstyń jańa úlgileri taralý qaýpi týraly aıtty. Onyń sózinshe, Amerıkada qańtar aıynda koronavırýstan 90 myń adam qaıtys bolǵan.

Keıingi kúnderi koronavırýs juqtyrǵandar men aýrýhanalardaǵy naýqas sany azaıyp jatyr, biraq jańa úlginiń taralýy indetke shaldyqqandar sanyn taǵy da arttyrýy múmkin.

AQSh-ta qańtardyń sońyndaǵy málimet boıynsha, koronavırýstyń «brıtandyq» nusqasy 308 adamnan, al «brazılııalyq» túri bir adamnan anyqtalǵan.

Ulttyq allergııa jáne ınfektsııalyq aýrýlar ınstıtýtynyń basshysy, doktor Entonı Faýchıdiń aıtýynsha, eger adamdar jappaı ekpe alsa koronavırýstyń jańa úlgileriniń paıda bolýy toqtaıdy.

Oksford ǵalymdarynyń qorytyndysy: Oxford/AstraZeneca vaktsınasy tıimdi

Oksford ýnıversıtetiniń ǵalymdary Oxford-AstraZeneca vaktsınasy vırýstyń taralýyn tómendetedi jáne alǵashqy ekpeden keıin-aq óte jaqsy qorǵanys túzedi degen qorytyndyǵa keldi.

«Bul búkil álemge oksford vaktsınasynyń tıimdi ári jaqsy jumys isteıtinin kórsetip tur. Ol ınfektsııanyń taralýyn úshten eki esege baıaýlatyp, biz jasaǵan strategııanyń durys ekenin dáleldedi», - dep málimdedi Mett Henkok.

Biraq keı eldiń ǵalymdary bul vaktsınanyń jasy úlken adamdarǵa tıimdiligi tolyq dáleldenbegenin alǵa tartyp otyr.

Kúshterdiń birigýi

Brıtandyq farmatsevtıka alyby GlaxoSmithKline men nemistiń CureVac bıotehnologııalyq kompanııasy kelesi jyly koronavırýstyń birneshe túrimen kúrese alatyn vaktsına jasap shyǵarý úshin kúsh biriktirdi.

CureVac óziniń jańa vaktsınasyn jeltoqsan aıynda Eýropa men Latyn Amerıkasynda testileýdi bastady jáne naýryz-sáýirge qaraı alǵashqy jalpylama nátıjege qol jetkizýdi kózdep otyr. GSK qoldaýynyń arqasynda kompanııa bıyl 300 mln doza shyǵarýdy josarlaǵan.

Ulttyq namys máselesi

Frantsııada eki zerthana koronavırýsqa qarsy vaktsına óndirip jatyr. Olardyń biri naýryzda Moderna-ny shyǵarýdy bastasa, ekinshisi sáýirde Pfizer-BioNTech vaktsınasyn óndirýge kirisedi.

Buǵan deıin prezıdent Emmanýel Makron bılikti vaktsınalaý protsesiniń baıaý júrip jatqanyna syn aıtqan synshylarǵa jaýap berip, jaqyn arada Frantsııada birden 4 fabrıka vaktsına óndirýge kirisetinin atap ótken.

Otandyq farmatsevtıka alpaýyty Sanofi kompanııasynyń vaktsınasy bıylǵy jyldyń sońynda ǵana daıyn bolatyny týraly málimdemesi ulttyq namysqa soqqy bop tıip, bılik ókilderi ekinshi toqsannan bastap kompanııa otandyq ónimdi jasaýdy jalǵastyra otyryp, Pfizer-BioNTech-ti óndirgeni durys ekenin aıtty.

Norvegııada lokdaýn jeńildetilýde

Toptasqan saýda oryndarynda ornalaspaǵan dúken men meıramhanalardyń ashylýyna ruqsat etildi. Biraq olarda áli de alkogol satýǵa tyıym salynady.

Mektepterdegi sabaqqa endi kóbirek oqýshylar bara alady.

23 qańtarda «brıtandyq» shtammnyń taralýyna baılanysty qatań sharalar engizilgen bolatyn. Sol kezde pandemııa bastalǵaly alǵash ret Oslo men onyń aýmaǵyndaǵy eldi mekenderde asa qajet dúkenderden basqasynyń bári jabylǵan.

Bul rette, Norvegııa shekarasy qatty qajettilik bolmasa, barlyq qozǵalys úshin áli de jabyq tur.

Dúnıejúzilik densaýlyq saqtaý uıymynyń ókilderi jeke zertteý júrgizý úshin Ýhan qalasynda júr

DDU ınspektorlary Tramp ákimshiligi pandemııaǵa kináli dep kúdiktengen Qytaı zerthanasyna tekseris júrgizýge keldi.

Ýhan vırýsologııa ınstıtýtynda kóptegen jyldar boıy vırýs tasymaldaıtyn jarqanattar zertteldi. Keıbir teorııalar boıynsha vırýs sol jerden syrtqa shyǵyp ketýi múmkin.

DDU ókilderiniń aıtýynsha, eshbir málimetti nazardan tys qaldyrýǵa bolmaıdy, sol sebepti ınspektorlar «qajetti suraqtyń bárin qoıady».

Instıtýttyń qaýipsizdik qyzmeti ókilderi jýrnalısterge DDU ınspektorlarymen tildesýge múmkindik bermedi.

Sársenbiden bastap álemde eń jyldam áreket etip jatqan Izraıldegi vaktsınalaý baǵdarlamasy 16 jastan asqan azamattardyń barlyǵyn qamtıdy. Buǵan deıin 35 jastan asqan turǵynnyń bári vaktsına alý kerek bolatyn.

Degenmen ızraıldik sarapshylardyń aıtýynsha, balalarǵa da ekpe jasatpaıynsha, ujymdyq ımmýnıtetke qol jetkizý qıyn.

Degenmen, Izraılde qoldanylyp jatqan Pfizer-BioNTech vaktsınalary 16 jasqa tolmaǵan balalarǵa maquldanbaǵan.

Sondaı-aq Izraıldegi vaktsınatsııa protsesiniń baıaýlaýyna arab jáne ýltraortodoksaldy qoǵam ókilderiniń ekpe jasatýdan bas tartýy sebep bolyp otyr degen boljam bar.

Jazǵy Olımpıada jáne Japonııadaǵy paralımpıada oıyndaryn uıymdastyrý komıteti, sondaı-aq HOK pen Halyqaralyq paralımpıada komıteti Tokıodaǵy Oıyndar kezinde sanıtarııalyq qaýipsizdikti qamtamasyz etý josparyn tanystyrdy.

Oıyn qonaqtarynyń barlyǵy 14 kún buryn jeke «is-shara josparyn» toltyrýy qajet. Onda eki aptalyq júrip-turý, ornalasqan jerin aýystyrý syndy qozǵalystyń barlyǵy jazylady.

Sondaı-aq olarǵa án aıtýǵa jáne mánerlep oqýǵa, qushaqtasýǵa nemese qol alysýǵa tyıym salynady. Tehnıkalyq qyzmetkerler men sportsh sheneýnikteri de óz quramasyna jankúıer bola almaýy múmkin, sebebi olarǵa kórermen retinde jarysqa qatysýǵa tyıym salynǵan.

Jaqynda sportshylar men oıynǵa qatysýshy basqa da azamattarǵa arnalǵan usynys jazylǵan býkletter jarııalanady.