Koronavırýs: Jambylda 11 adam - statsıonarda, 9 adam - úı karantıninde jatyr
TARAZ. QazAqparat – Jambyl oblysy ákimdigi densaýlyq saqtaý basqarmasynyń basshysy Marat Jumanqulov ÓKQ aqparat alańynda koronavırýs indetiniń aldyn alý, profılaktıkalyq sharalar týraly baıandap berdi, dep habarlaıdy QazAqparat.
Spıkerdiń aıtýynsha, Jambyl oblysy ákiminiń ókimimen oblystyq komıssııa quramy, onyń jospary men jumys algorıtmi men mindetteri bekitilgen. Barlyq medıtsınalyq uıymdar koronavırýsty ınfektsııamen aýyratyn naýqastardy qabyldaýǵa jáne emdeýge, sondaı-aq statsıonarlyq jaǵdaıda karantınge oqshaýlaýǵa daıyn.
«Barlyq emdeý, aldyn alý mekemelerinde medıtsına qyzmetkerleri úshin sanıtarlyq avtotransporttyń, jeke qorǵaný quraldarynyń, dezınfektsııalyq preparattardyń, dárilik zattardyń qajetti qorynyń bolýy qamtamasyz etilgen. 1040 tósektik tósek qory daıyndaldy, onyń ishindegi 400-i - aýrýlardy emdeý úshin, 640 tósek - karantın úshin. Emdeý-aldyn alý is-sharalaryn uıymdastyrý jáne ótkizý úshin joǵaryda kórsetilgen nysandarda 610 joǵary bilikti arnaıy oqytylǵan medıtsına qyzmetkeri jumyldyryldy»,-dedi basqarma basshysy.
Búgingi tańda oblys aýmaǵyna basqa elderden kelýshilerge tıisti medıtsınalyq baqylaý monıtorıngi júrgizilýde. 17 naýryzdaǵy jaǵdaı boıynsha oblys aýmaǵynda 1 a sanattaǵy elderden (QHR, Iran, Ońtústik Koreıa, Italııa) kelgen 11 azamat karantınge jatqyzyldy. Barlyq oqshaýlanǵandardyń densaýlyq jaǵdaıy qanaǵattanarlyq. Al, 1 b sanattaǵy elderden (Frantsııa, Germanııa, Ispanııa) úı karantınine 9 adam alyndy. 2 sanattaǵy elderden (Shveıtsarııa, Ulybrıtanııa, Nıderland) kelgen azamattar joq. Bul jumys kúndelikti, tıisti baqylaýda jáne ári qaraı jalǵasýda.
