Koronavırýs: Jambyl oblysynda jedel járdemdi shaqyrtýlar sany artty
TARAZ. QazAqparat – Jambyl oblysynyń ákimi Berdibek Saparbaevtiń tóraǵalyǵymen ótken koronavırýs ınfektsııasyna qarsy is-qımyl jónindegi jedel shtab otyrysynda oblystaǵy epıdemıologııalyq jaǵdaı, sondaı-aq vaktsınatsııa máseleleri saralandy, dep habarlaıdy QazAqparat tilshisi.
Densaýlyq saqtaý basqarmasynyń basshysy Áset Qalıevtiń aıtýynsha, Jambyl oblysynda koronavırýstyń táýliktik ósimi 0,4 paıyzdy quraıdy.
«Búgingi tańda ınfektsııalyq statsıonardaǵy 1200 tósektiń 460-y júktelgen, 45 naýqas reanımatsııada em alýda. Karantındik statsıonarda 18 adam, úı karantıninde 1741 adam jatyr», - dedi basqarma basshysy.
Ol sonymen qatar sońǵy aptada oblysta koronavırýstyń 152 jaǵdaıy tirkelgenin aıtty. Ásirese, Taraz, Shý, Jambyl jáne Baızaq aýdandarynda jaǵdaı shıelenise túsken.
«Sońǵy eki aptada koronavırýs belgilerimen baılanysty jedel járdemdi shaqyrtýlar sany 491-den 599-ǵa deıin ósse, pnevmonııamen, kerisinshe, 87-den 48-ge deıin azaıdy», - dep atap ótti Á.Qalıev.
Sondaı-aq, basqarma basshysy elimizde koronavırýs boıynsha jaǵdaıdyń nasharlaýyna baılanysty óńirimizde ınfektsııalyq statsıonarlyq eki myń tósekten turatyn rezerv daıyndalýda, onyń 200-i reanımatsııalyq ekenin tilge tıek etti.
«Óńirdiń barlyq medıtsınalyq uıymdary jalpy somasy jeti mıllıard teńgege dári-dármektermen jáne medıtsınalyq buıymdarmen qamtamasyz etilgen. Onyń 1,2 mıllıard teńgesi koronavırýspen kúreske qajetti preparattarǵa jumsaldy. Tapshylyq joq», - dep atap ótti Áset Qalıev.
«Bizdiń óńir ázirge «jasyl« aımaqta tur, alaıda eldegi jáne oblystaǵy jaǵdaı shıelenise túsýde, qyraǵylyqty joǵaltýǵa bolmaıdy», - deıdi S.Álibaeva.
