Koronavırýs: Jambyl oblysynda vaktsına saldyrǵandar sany 320 myńǵa jýyqtady
Jıynda baıandama jasaǵan oblys ákimdigi densaýlyq saqtaý basqarmasynyń basshysy Áset Qalıevtyń aıtýynsha, qazirgi tańda Taraz qalasy men Talas, Shý, Qordaı aýdandary «qyzyl» aımaqta tursa, Jambyl, Jýaly, Merki, Sarysý, T.Rysqulov, Baızaq jáne Moıynqum aýdandary «jasyl» aımaqta.
Bekitilgen josparǵa sáıkes, aǵymdaǵy jaǵdaı boıynsha oblystaǵy aýrýhanalarda 3 584 ınfektsııalyq tósek qory, onyń ishinde 416 reanımatsııalyq tósek qory, oǵan qosa 170 tósek orynǵa arnalǵan karantındik statsıonarlar jumys atqarýda.
Sońǵy aqparattarǵa súıensek, ınfektsııalyq statsıonarlarda 2265, reanımatsııada 183 naýqas em qabyldaýda.
Oblys boıynsha jyl basynda 582 myń adam koronavırýs ınfektsııasyna qarsy vaktsına alady dep josparlanǵan. Qazirgi tańda 318 331 adam ekpe alyp, jospar 54,7 paıyzǵa oryndalyp otyr. Sondaı-aq, basqarma basshysy qajetti dári-dármektiń jetkilikti ekenin aıtty.
«Bári oıdaǵydaı bolsa, biz nege respýblıkalyq kórsetkish boıynsha 12-13 oryndarda turmyz? Mynaý kórshi Túrkistan oblysynda vaktsına alýdyń birinshi komponenti 71,2 jáne ekinshi komponenti 57,7 paıyzǵa oryndalǵan. Al bizdiń mundaı kórsetkishke jetýimizge ne kedergi?» - dep surady oblys ákimi.
Basqarma basshysy «qyzyl» aımaqtaǵy Taraz qalasy men aýdandarmen jumysty kúsheıtip jatqandaryn aıtyp aqtaldy.
Shtab otyrysyna onlaın qosylǵan Taraz qalasynyń ákimi Erjan Jylqybaev shahar boıynsha aýrýhanaǵa túsýshiler sany osy aptada azaıa bastaǵanyn, onyń bir sebebi retinde meıramhanalardaǵy qaptaǵan toılardyń toqtatylýyn alǵa tartty. Qala basshysy ár joǵary oqý orny men kolledjderge medıtsına mamandary arnaıy baryp, stýdentterge vaktsına salý boıynsha túsindirý jumystaryn júrgizetinin jetkizdi.
Odan ári oblys basshysy ekpe boıynsha kórsetkishi artta qalǵan birneshe aýdannyń aýyldyq okrýgteri boıynsha naqty faktilermen mysaldar keltirdi.
Jıynda sóz alǵan oblys ákiminiń orynbasary Almas Madıev vaktsına saldyrǵan turǵyndardyń aýyrmaǵanyn, aýyrsa da jeńil ótip jatqanyn, al jansaqtaý bóliminde jatqan naýqastardyń barlyǵy ekpe almaǵandar ekenin ashyq aıtty.
«Adamdardyń ómiri bárinen qymbat. Barlyq aýdan ákimdiginiń ókilderi aýyldyq okrýgterge shyǵyp, ekpe boıynsha túsindirý jumystaryn arttyra túsýleri qajet. Aýdannyń aqsaqaldaryn, bedeldi azamattaryn bul iske jumyldyrǵan jón. Túsindirý jumystary nashar jerde, vaktsına da nashar salynyp jatyr. Bulaı bolmaıdy. Jańa oqý jyly bastalýǵa jaqyn. Bilim basqarmasy barlyq mektepterdiń qaýipsizdigin, «Ashyq» baǵdarlamasynyń engizilýin, oqýshylardyń alańsyz bilim alýyna jaǵdaı týǵyzýdy qatań baqylaýǵa alsyn»,- dedi aımaq basshysy.
Jıyndy qorytyndylaǵan oblys ákimi jaýapty tulǵalarǵa otteginiń jáne qajetti dári-dármektiń jetkilikti bolýyn qamtamasyz etýdi, ujymdyq ımmýnıtet qalyptastyrý úshin vaktsına jumystaryn jedeldetýdi, qoǵamdyq oryndarda dezınfektsııa sharalaryn jandandyrýdy júktedi.