Koronavırýs: Jambyl oblysyna Qytaıdan kelgen 37 azamat qatań baqylaýda
TARAZ. QazAqparat – Jambyl oblysy aýmaǵynda etıologııasy belgisiz pnevmonııanyń, ıaǵnı koronavırýstyń ákelinýi men onyń taralýynyń aldyn alý jónindegi sanıtarııalyq epıdemııaǵa qarsy jáne aldyn alý is-sharalaryn kúsheıtý maqsatynda birqatar jumystar atqaryldy, - dep habarlaıdy QazAqparat.
Oblys ákimdiginiń densaýlyq saqtaý basqarmasynyń basshysy Marat Jumanqulovtyń aıtýynsha, qazirgi tańda oblysta koronavırýsqa kúdikti naýqastar tirkelmegen. Alaıda, bul baǵyttaǵy aldyn alý is-sharalary ári qaraı júıeli túrde júrgizile bermek.
«Oblystyq balalar juqpaly aýrýlar aýrýhanasy men aýdandardaǵy ortalyq aýrýhanalardyń ınfektsııalyq bólimshelerinde 503 tósek ony bar bolsa, oǵan qosymsha eresekterge – 147, balalarǵa – 186, barlyǵy 333 tósek daıyndaldy. Medıtsınalyq uıymdar jeke bas qorǵanys kıimderimen, vırýsqa qarsy preparattar men vırýtsılıdti dezınfektsııalyq zattardyń qorymen qamtamasyz etildi. Óńirdegi medıtsına qyzmetkerleri arasynda belgisiz pnevmonııanyń dıagnostıkasy, emdeý jáne aldyn alý týraly keńes-semınarlar ótti. Atap aıtsaq, barlyǵy 45 semınar ótip, oǵan 3226 medıtsına qyzmetkeri qatysty»,-deıdi basqarma basshysy.
Sonymen qatar oblystaǵy quzyrly mekemelerdiń mamandarynyń qatysýymen bıyl 24 qańtarda «Áýlıe Ata» áýejaıynda belgisiz pnevmonııanyń ákelinýi men onyń taralýynyń aldyn alý, birinshi kezektegi sharalardy uıymdastyryp, ótkizý boıynsha oqý-jattyǵý sabaǵy ótkizilgen. «Emdeý mekemeleriniń, onyń ishinde jedel medıtsınalyq járdem stantsııasynyń medıtsına qyzmetkerleri arasynda belgisiz pnevmonııaǵa kúdikti jaǵdaılardy anyqtaý, tirkeý, esepke alý, shuǵyl habarlama joldaý, naýqastardy qabyldaý men olarǵa jedel mamandandyrylǵan kómek kórsetý boıynsha daıarlyǵy shyńdaldy. Oblystyń barlyq medıtsına uıymdarynyń qabyldaý bólimderinde, qaraý bólmelerinde, jedel medıtsınalyq járdem stantsııasynda medıtsına qyzmetkerlerine arnalǵan algorıtmder ázirlendi», -deıdi M.Jumanqulov.
Aıta keteıik, oblystyq polıtsııa departamenti kóshi-qon basqarmasynyń málimetterine sáıkes, aǵymdaǵy jyldyń qańtar aıynda Qytaı Halyq Respýblıkasynan oblysymyzǵa 37 azamat kelgen. Olardyń barlyǵy turaqty mekenjaı boıynsha emdeý mekemeleriniń medıtsına qyzmetkerleriniń qatań baqylaýyna alynǵan. Qazirgi tańǵa deıin 25 azamat 14 kúndik medıtsınalyq baqylaýdan ótse, baqylaýdan ótip jatqan 12 azamat boıynsha eshqandaı shaǵymdar oryn almaǵan.
