Koronavırýs: Jabyq keshendegi IX Azııa chempıonaty Qytaıda ótpeıtin boldy
NUR-SULTAN. QazAqparat – Qytaıdyń Ýhan qalasynda (Hýbeı provıntsııasy) taraǵan koronavırýs aýrýyna baılanysty Hanchjoýda josparlanǵan jabyq keshendegi IX Azııa chempıonaty ótpeıtin boldy, dep habarlaıdy QazAqparat tilshisi.
QR Ulttyq olımpıadalyq komıteti habarlaǵandaı, qurlyqtyq birinshilik 12-13 aqpan kúnderi Qytaıdyń Hanchjoý qalasynda ótýi tıis bolǵan. Alaıda, Qazaqstan jeńil atletıka federatsııasynyń baspasóz qyzmetine jarystyń ótpeıtindigi týraly Azııa jeńil atletıka qaýymdastyǵynan hat kelgen. Onda jarystyń bolmaıtyny týraly aıtylǵan. Basqarma prezıdenti Dahlan al-Hamad qurlyqtyq qaýymdastyq atynan vırýstyń taralýyna alańdaýly ekenin jetkizgen.
Esterińizge sala keteıik, osyǵan deıin Ýhanda 3-14 aqpan aralyǵynda ótetin 2020 jylǵy Tokıo Olımpıadasyna Azııa/Tynyq muhıty elderiniń boksshylaryn irikteýdi keıinge qaldyrý sheshimi qabyldanǵan bolatyn.
Keıinnen bul atalǵan irikteý týrnırdi Halyqaralyq Olımpıada komıtetiniń jumys toby 3-11 naýryz aralyǵynda Iordanııanyń Amman qalasynda ótkizetin bolyp sheshti.
