Koronavırýs: Vaktsına óndirisiniń basty maqsaty kommertsııalyq paıda tabý emes
Sarapshylardyń derekteri boıynsha QFK reseılik sýbstantsııadan daıyn ónimdi óndirýge anaǵurlym daıyn bolyp shyqty. RTIQ mamandary júrgizgen tehnıkalyq aýdıt nátıjesi óndiristik alańnyń koronavırýsqa qarsy vaktsınanyń daıyn túrin shyǵarý úshin barlyq talaptarǵa sáıkes keletinin rastady.
QR Úkimeti janyndaǵy Qazaqstanda koronavırýstyń taralýyna jol bermeý jónindegi vedmstvoaralyq komıssııa málimetterine qaraǵanda, b úgingi tańda QFK halyqaralyq GMP standartyna saı, bıotehnologııalyq preparattardy óndirýge tolyq mamandandyrylǵan, barlyq qajetti ınfraqurylymǵa ıe, álemdik jetekshi óndirýshilerdiń tehnologııalyq jáne zerthanalyq jabdyqtarymen jabdyqtalǵan Qazaqstan Respýblıkasyndaǵy alǵashqy jáne ázirge jalǵyz farmatsevtıkalyq kásiporyn.
Reseılik «Spýtnık V» vaktsınasyn óndirý sheńberinde QFK men vaktsına óndirisiniń lıtsenzııasy jáne noý-haý ıesi bolyp tabylatyn RTIQ arasynda seriktestik qarym-qatynas ornatylǵan. RTIQ-tan jetkizetin shıkizattan (farmatsevtıkalyq sýbstantsııa) daıyn vaktsına shyǵarady. QFK tıesili zerthanasynda jáne vaktsına jasaýshy - Máskeýdegi Gamaleıa atyndaǵy Ǵylymı-zertteý ınstıtýtynyń zerthanasynda sapasy boıynsha eki rettik baqylaýdy júzege asyrady. Qatań baqylaýdan ótkennen keıin vaktsına QR DSM biryńǵaı dıstrıbıýtoryna jetkiziledi. Preparatty ári qaraı alyp júrý - farmakologııalyq qadaǵalaý QFK mindetine kiredi. Ekpeden keıingi jaılardy monıtorıngileý, ekpe qabyldaǵan adamdardyń ótinishteri men shaǵymdaryn jınaý men taldaý da kiredi.
Qaraǵandy farmatsevtıkalyq kesheni negizinde COVID-19 qarsy vaktsına óndirý - Qazaqstan halqy úshin basym mánge ıe strategııalyq mańyzdy áleýmettik joba bolyp tabylady. Bul óndiris joǵary tıimdi bolyp tabylmaıdy, sebebi, satý baǵasy tek óndiris shyǵyndaryn jabady. Alaıda, vaktsına óndirisiniń basty maqsaty kommertsııalyq paıda kórý bolmaǵandyqtan, vaktsınany erekshe jaǵdaılarda, ıaǵnı paıdany eskerýsiz shyǵarý týraly sheshim qabyldandy.
Joba memleketaralyq kelisimderdiń nátıjesi jáne eki memleket úkimetteriniń jáne QR Densaýlyq saqtaý mınıstrliginiń tikeleı jetekshiliginde. QR DSM men RTIQ arasynda reseılik vaktsınanyń 2 mln. mólsherin jetkizý týraly memorandýmǵa qol qoıyldy. Qol jetkizilgen ýaǵdalastyqtarǵa sáıkes, 2021 jyldyń maýsymyna deıin vaktsınanyń qajetti kólemin óndirý josparlanyp otyr. Qazirgi ýaqytta QR DSM men QFK arasynda tıisti kelisim jasasý boıynsha jumystar júrgizilýde.
Qaraǵandy farmatsevtıkalyq kesheni jaıynda qosymsha aqparat.
Qaraǵandy óndiristik kesheni – bul jańa farmatsevtıkalyq tehnologııalarǵa sáıkes jeke ınvestıtsııalar úshin jabdyqtalǵan qazaqstan-reseı birlesken kásiporny. Investorlar tarapynan aldyńǵy qatarly farmatsevtıkalyq keshendi jabdyqtaýǵa 50 mıllıon dollardan astam qarjy jumsaldy. Maqsaty - qazaqstandyq patsıentterdi emdeý úshin ómirlik mańyzdy dárilik preparattar óndirisin oqshaýlaý, sonymen qatar, bul úshin jetekshi reseılik ǵylymı zerthanalardyń quzyreti tartylǵan.
QFK jyl saıyn jetkiziletin dári-dármekterdiń tizbesin keńeıte jáne is júzinde bizdiń elimizdiń turǵyndary úshin strategııalyq mańyzdy baǵytta ımportty almastyrý baǵdarlamasyn júzege asyra otyryp, ómirlik mańyzy bar dári-dármekterdi QR Densaýlyq saqtaý mınıstrliginiń qajettilikteri úshin jetkizýdi iske asyrady. QFK onkologııa, gemofılııa, gepatıt, qant dıabeti jáne basqalary sııaqty áleýmettik mańyzy bar kúrdeli aýrýlardy emdeýge arnalǵan zamanaýı preparattardy shyǵarady. Osy oraıda, 2020 jyldyń sońyna qaraı farmatsevtıkalyq keshen sońǵy bir jyldyń ózinde 20-ǵa jýyq jańa preparatty shyǵarýdy ıgerip, 60 ataýly dárilik quraldy óndirdi.
Qazaqstanda buryn óndirilmegen birqatar dári-dármekter jelisin keńeıtý jáne ımportty almastyrý úzdiksiz jalǵasýda. Preparattar QR Densaýlyq saqtaý mınıstrliginiń biryńǵaı memlekettik dıstrıbıýtory «SK-Farmatsııa» kompanııasyna jetkiziledi. Buryn sheteldik óndirýshiler jetkizgen preparattar baǵasynyń tómendeýiniń arqasynda elimizdiń memleket bıýdjeti osy maqsattarǵa jyl saıyn 1 mıllıard teńgeden astam qarajat únemdeıdi.
Sonymen qatar, QFK Qaraǵandy oblysyndaǵy eń iri salyq tóleýshiler men jumys berýshilerdiń biri, kásiporynda 200 jumys orny uıymdastyrylǵan. QFK-da joǵary tehnologııalyq farmatsevtıkalyq ónimderdi óndirý salasynda bilim men tájirıbege ıe joǵary sanatty mamandar toby (QFK mamandarynyń 99%-y - QR azamattary) jınalǵan.