Koronavırýs: Úndistanda mektepter ashyla bastady, Madrıdte karantın engizilmek
LONDON. QazAqparat – Madrıdte jańa karantın shekteýleri engizilip jatyr, biraq qala bıligi buǵan qarsy. Sondaı-aq Shveıtsarııada buqaralyq sharalarǵa qaıta ruqsat berildi, dep habarlaıdy QazAqparat VVS agenttigine silteme jasap.
Djons Hopkıns ýnıversıtetiniń málimeti boıynsha, Covid-19 juqtyrǵandardyń jalpy sany álemde 34 mln adamǵa jetti, 1 mıllıonǵa jýyǵy qaıtys boldy. Pandemııa bastalǵaly 23,6 mln patsıent vırýstan aıyǵyp ketti.
Ispanııa úkimeti Madrıd pen onyń mańyndaǵy toǵyz qalanyń jergilikti bıligine 48 saǵatqa karantındik sharalar engizýdi tapsyrdy. Ispanııada Covid-19 aýrýyna shaldyqqandar sany artýda. Sońǵy eki aptada elde 133 myńnan astam adam koronavırýs juqtyrǵan. Olardyń úshten biri el astanasynan.
Engizilgen jańa sharalar boıynsha, atalǵan qala turǵyndary aýdandar arasyna qatynaı almaıdy. Tek jumysqa, oqý oryndaryna, sondaı-aq dárigerge nemese jaqyndaryna qajettilik bolǵan jaǵdaıda ǵana ruqsat etilgen. 6 adamnan artyq toptasyp júrýge tyıym salynǵan.
1 qazannan bastap Shveıtsarııada sporttyq jarystar men mádenı sharalarǵa bir ýaqytta 1000-nan kóp emes adam qatysýǵa ruqsat etildi. Munda gıgeınalyq sharalar men áleýmettik qashyqtyqty qatań saqtaý kerek.
Londonnyń ımperııalyq kolledji júrgizgen jańa zertteý málimetteri boıynsha Brıtanııada Covid-19 vırýsynyń taralýy báseńdeı bastady.
Ǵalymdardyń pikirine sáıkes, bir vırýs tasymaldaýshydan qansha adam aýrý juqtyrýy múmkin ekenin anyqtaıtyn R bazalyq kórsetkishi tómendedi. Onyń tómendeýine Úkimet jaqynda engizgen jańa shekteý sharalary kómektesti. Endi Anglııada jáne Ulybrıtanııanyń basqa bólikterinde pabtar men meıramhanalar 22:00-den keshiktirilmeı jabylady, alty adamnan artyq toptasyp jınalýǵa tyıym salynady, dúkender men meıramhana qyzmetkerlerine mindetti túrde maska taǵý mindetteldi.
Aýstralııanyń Vıktorııa shtatynyń turǵyndary eldegi eń qatań qaýipsizdik sharalaryn saqtaýǵa májbúr. Aýstralııadaǵy aýrý juqtyrǵandardyń jalpy sany qazir 27 myńnan astam adamdy quraıdy, 900-ge jýyq naýqas qaıtys boldy.
Úndistanda 15 qazannan bastap kınoteatrlarǵa, kórme zaldaryna jáne basqa da mádenı ortalyqtarǵa barýǵa ruqsat etiledi. Sol kúnnen bastap mektepter men kolledjder de ashylady. 30 qyrkúıekte Úndistanda 80 myńnan astam koronavırýs juqtyrýdyń jańa jaǵdaıy tirkeldi. Epıdemııa bastalǵaly aýrýǵa shaldyǵý jaǵdaılarynyń jalpy sany alty mıllıonnan asty. Bul – ınfektsııanyń taralýy boıynsha AQSh-tan keıingi álemdegi ekinshi el.
