Koronavırýs: Ulybrıtanııa tamyz aıyna deıin týrısterge shekarany ashpaýy múmkin

LONDON. QazAqparat – Ulybrıtanııa maýsymnyń sońyna qaraı álemniń basqa elderimen kólik baılanysyn qalpyna keltirýi ekitalaı, al shetelde demalǵysy keletin brıtanııalyqtar muny tamyz aıyna deıin shegere turýǵa májbúr bolady, dep habarlaıdy QazAqparat BBC agenttigine silteme jasap.

Brıtanııalyqtar qaıtadan shetelge qashan bara alatyndyǵy týraly bılik 12 sáýirde habarlaýǵa ýáde berdi. Qazirgi ýaqytta Ulybrıtanııadan shyǵýǵa birneshe jaǵdaıda ǵana ruqsat etiledi.

Atap aıtqanda, jumys, bilim alý, úılený toılary men jerleý rásimderi, sondaı-aq erekshe jeke jaǵdaılar.

Ulybrıtanııaǵa kirýshilerge keletin bolsaq, olar kelgennen keıin 10 kún oqshaýlanyp, óz esebinen quny 210 fýnt sterlıng bolatyn eki test tapsyrýlary tıis. Sondaı-aq kelýshiler eldegi shekteýler rejımin ustanýlary kerek.

«Qyzyl tizimdegi» elderden qazir elge tek brıtanııalyq nemese ırlandııalyq tólqujat ıeleri, sondaı-aq elde turaqty turýǵa quqyǵy bar adamdar kire alady.

Karantın sharalaryn jeńildetý

Jeksenbi kúngi málimetterge sáıkes, 30 mıllıonnan astam brıtanııalyqtar vaktsınanyń alǵashqy dozasyn aldy.

Dúısenbide elde keıbir shekteýler alyndy. Mysaly, «úıden shyqpaý» erejesi joıyldy, keıbir sporttyq is-sharalarǵa ruqsat etildi, alty adamǵa deıin úıden tys jerde kezdese alady. Bul – lokdaýndy tolyǵymen alyp tastaýdyń alǵashqy qadamy. Áleýmettik alystaý erejeleri áli de kúshinde.

Ulybrıtanııada syrqattaný deńgeıi qańtar aıynda kúnine 60 myń jaǵdaıdan naýryzdyń aıaǵynda kúnine 5 myń jaǵdaıǵa deıin tómendedi.

Sky News telearnasynda sóılegen sózinde mádenıet mınıstri Olıver Doýden úkimet qazir brıtan halqyna halyqaralyq saparlardy qalaı jandandyrýǵa bolatyny jaıly oılaný ústinde ekenin aıtty.