Koronavırýs: Túrkııa kúzge deıin óz vaktsınasyn jasap shyǵarady

ANKARA. Anadoly-QazAqparat - Túrkııada jasalyp jatqan koronavırýsqa qarsy vaktsına bıyl kúzde tolyq daıyn bolady, dep habarlaıdy QazAqparat Anadoly agenttigine silteme jasap.

Bul jaıynda Túrkııa prezıdenti Rejep Taıyp Erdoǵan arnaıy brıfıngte aıtty.

«Túrkııada koronavırýs ınfektsııasyna qarsy otandyq vaktsına jasaý jumysy belsendi jalǵasyp jatyr. Bıylǵy qyrkúıek-qazan aılaryna deıin osy jumystyń nátıjesin kóremiz degen nıet bar» dep atap ótti túrik kóshbasshysy.

Onyń aıtýynsha, otandyq vaktsına Túrkııadaǵy suranysty ǵana jaýyp qoımaı, basqa elderge de taratylady.

«Ankara suranys joldaǵan álemniń kez kelgen eline vaktsına jetkizýge daıyn» dedi Rejep Taıyp Erdoǵan.

Túrkııa prezıdenti buǵan deıin Reseı prezıdenti Vladımır Pýtınmen reseılik Spýtnık V vaktsınasyn satyp alý jaıyn talqylaǵan bolatyn.

«Bul jerde áńgime Túrkııaǵa jetkiziletin ekpeniń óte qomaqty kólemi jaıynda bolyp otyr. Sosyn biz Túrkııada birlesken ónerkásipti iske qosamyz» dep túıindedi sózin Erdoǵan.

Eske sala keteıik, biz buǵan deıin Túrkııada Spýtnık V vaktsınasynyń óndirisi iske qosylatynyn jazǵan bolatynbyz.