Koronavırýs: Túrkistan oblysynyń statsıonarlarynda 100 oryn daıyndaldy
TÚRKІSTAN. QazAqparat – Túrkistan oblysynda koronavırýs ınfektsııasymen kúreske baǵyttalǵan sharalar aıasynda statsıonarlarda 100 tósek-oryn daıyndaldy, dep habarlaıdy QazAqparat.
Óńirlik kommýnıkatsııalar qyzmetinen málim etkendeı, indetke uqsas belgileri bar naýqastardy jatqyzý, dıagnozdaryn naqtylaý úshin taǵy 240 orynǵa provızorlyq gospıtaldar qarastyrylǵan.
Oblystyq densaýlyq basqarmasy basshysynyń mindetin atqarýshy S.Jamalovanyń sózinshe, barlyq aýdandar men qalalardaǵy ınfektsııalyq aýrýlar bólimderi daıyndyq jaǵdaıyna keltirilgen. Búginde aýyrǵandarmen qarym-qatynasta bolǵandardy oqshaýlaý úshin aımaqta jalpy 505 tósek-oryn bolatyn observatsııalyq ortalyqtar daıyn tur.
«52 dáriger, 138 orta býyn jáne 147 kishi býyn qyzmetkeri joǵaryda atalǵan statsıonarlarda qyzmet kórsetedi. Sondaı-aq, QR Densaýlyq saqtaý mınıstrligine qajettiligi bar 24 dáriger, 5 orta býyn men 5 kishi býyn qyzmetkeri týraly málimet usynyldy», – dedi oblystyń bas dárigeri.
Barlyq medıtsınalyq uıymdarda koronavırýstyń klınıkasy, emdeý jáne dıagnostıkalaý taqyrybynda 2 retten semınar ótkizildi. Aýla aralaý jumystary júrgizilýde. Úı karantınindegi barlyq azamattarǵa baqylaý júrgizilip jatyr.
QR Úkimetiniń rezerv qorynan bólingen qarajat esebinen oblysqa 165 900 medıtsınalyq betperde jetkizilgen. Onyń 81 000 danasy medıtsınalyq uıymdarǵa taratylyp, qalǵandary ortalyqtandyrylǵan qoımada saqtalýda. Medıtsınalyq uıymdarda birrettik betperdelerdiń shyǵyndaryn únemdeý úshin birneshe ret qoldanylatyn qosymsha 77 000 medıtsınalyq maska tigildi.
Aıta keteıik, 2020 jylǵy 26 naýryzdaǵy jaǵdaı boıynsha Túrkistan oblysynda koronavırýs ınfektsııasy (COVID-19) tirkelgen joq.
