Koronavırýs: Túrkistan oblysynyń aýrýhanalarynda oryndar sany arttyrylyp jatyr
TÚRKІSTAN. QazAqparat – Túrkistan oblysynda koronavırýsqa shaldyqqan naýqastardy emdeý úshin qosymsha tósek oryndary qurylyp jatyr. Bul týraly Qoǵamdyq densaýlyq basqarmasy basshysynyń orynbasary Nurhan Narymbetova málimdedi, dep habarlaıdy QazAqparat tilshisi.
Nurhan Narymbetovanyń aıtýynsha, Túrkistan men Kentaý qalalarynda ókpesi qabynyp, aýrýhana kómegine júgingen naýqastar sany kóbeıgen. Olar negizinen vırýsty pnevmonııa, bakterıaldy pnevmonııa, JRVI sııaqty syrqat túrlerimen aýyrǵany anyqtalýda. Degenmen, túrli qaýiptiń aldyn alý men qaýipti indetke shaldyqqandardy emdeý úshin jeke klınıkalardan da provızorlyq tósek oryndary qurylýda.
«Máselen, júkti áıelder úshin keshe oblystyq perınataldyq ortalyqtan provızorlyq 40 tósek ornyn ashtyq. Odan bólek, jekemenshik «Talǵat» klınıkasynan - 40, Qoja Ahmet ıAsaýı atyndaǵy qazaq-túrik ýnıversıtetiniń klınıkasynan - 30, «Aqmaral» klınıkasynan da biraz tósek oryndar ashyldy. Sonymen qatar, qalalyq ortalyq aýrýhanada 150 tósek oryn bolsa, endi onyń sany 220 orynǵa kóbeıtildi. Sol sebepti bizge kelgen naýqastardyń barlyǵy statsıonarlyq emderin qabyldaýda», - deıdi basqarma basshysynyń orynbasary.
Onyń sózinshe, qazir qaýipti indet juqtyrǵan naýqastardyń emine vırýsqa qarsy «Alývııa» preparaty men antıbıotıkter qoldanylyp jatyr. Al, tynys jetispeýshiligi bar naýqastarǵa ylǵaldy ottegi beriledi.
«Naýqastarda koronavırýs anyqtalǵan jaǵdaıda 14 kúnge deıin aýrýhanaǵa jatqyzylyp, emderin qabyldaıdy. Turaqty dárigerdiń baqylaýynda bolady. Eki aptadan keıin qaıta synamalar alynyp, test nátıjesi teris shyqsa ǵana aýrýhanadan shyǵarylady. Al, naýqastarmen baılanysta bolǵan adamdar óz úılerinde oqshaýlanýda. Olardan onynshy kúni qaıta synamalar alynyp, tekseriledi. Eshqandaı belgileri bolmasa, 14-shi kúni eshbir analız tapsyrmaı-aq, karantınnen shyǵarýǵa bolady», - deıdi basqarma basshysynyń orynbasary.
Dárigerdiń aıtýynsha, COVID-19 juqpasynyń erekshiligi sol, basqa respıratorlyq aýrýlarǵa qaraǵanda pnevmonııanyń tez órshýine jáne tynys jetispeýshiligine ákeledi.
«Qosymsha aýrýlary (qant dıabeti, júrek aýrýy, tynys jetispeýshiligi, sozylmaly bronhıt, qan qysymynyń kóterilýi jáne t.b) bar naýqastarda aýyr týrde ótedi. Keı kezderi tipti, aýrýdyń sońy ólimge ákelýi múmkin. COVID-19 pnevmonııasynyń aıyrmashylyǵy, eger de naýqastardyń ókpe tusyn kompıýterlik tamografııaǵa túsirgende eki ókpede barlyq segmentter zaqymdalady jáne fıbrozǵa ákeledi. Sondaı-aq qaýipti indettiń aýrý belgileri ıisti, dámdi sezbeı qalýdan bastalady. Adamda álsizdik paıda bolyp, dene qyzýy kóteriledi. Jótel qysyp, tynys alýy qıyndaı bastaıdy», - deıdi N. Narymbetova.
Sala mamanynyń sózinshe, aýrýdan saqtaný úshin adamdar únemi betperdemen júrgeni jón. Ózara jáne basqa adamdarmen 2 metrden kem emes araqashyqtyqty saqtaı otyryp, tyǵyz qarym-qatynastan alshaq bolýy kerek. Qolyn da únemi sabyndap jýyp, quramynda spırti bar zatpen óńdegeni abzal.
