Koronavırýs: Túrkistan oblysynda tósek-oryn sanyn 5,5 myńnan asyrýǵa múmkindik bar
TÚRKІSTAN. QazAqparat - Túrkistan oblysynda 600 ınfektsııalyq jáne 340 karantın tósek-oryn uıymdastyrylǵan, dep habarlaıdy QazAqparat.
Búgingi tańda ınfektsııalyq tósek-oryn júktemesi - 14,2%. Karantın tósek-orynnyń júktemesi - 16%.
Koronavırýs ınfektsııasynyń ártúrli stsenarııine baılanysty ınfektsııalyq tósek-oryn sanyn 5 610-ǵa deıin ulǵaıtýǵa múmkindik bar.
Bul týraly óńirlik kommýnıkatsııalar qyzmetinde ótken brıfıngte oblystyq bas dárigeri Marat Pashımov málimdedi.
Onyń aıtýynsha, óńirdegi memlekettik PTR zerthana sany 3-ten 10-ǵa deıin ósken. Zerthanalarda jalpy 369 155 adam tekserýden ótken.
«Medıtsınalyq uıymdardy dárilik zattar jáne arnaıy qorǵanysh quraldarymen qamtamasyz etý maqsatynda jalpy 3,1 mlrd teńge bólindi. Atalǵan qarjylarǵa 361,8 mln teńgege dári-dármek, 1,6 mlrd teńgege medıtsınalyq buıymdar, 185 mln teńgege dezınfektsııalyq ertindi satyp alyndy. Sondaı-aq, ókpeni jasandy jeldetý apparattarynyń sany 178-den 348-ge deıin artty. Qosymsha 4 ottegi stantsııasy ornatylyp, stantsııa sany 8-ge jetti.Sondaı-aq, 80 birlik oksıgenatsııa apparaty (HI-FLOW) satyp alyndy. Budan bólek, ottegi kontsentratorlarynyń sany 890-ǵa jetti. Oblystyq bıýdjet esebinen 1 kompıýterlik tomograf pen 3 rentgen apparaty ornatyldy. Medıtsınalyq uıymdarda pýlsoksımetrdiń qamtamasyz etilýi 190-nan 4 069-ǵa deıin jetti», - dedi Marat Orynbasaruly.
Oblysta COVID-19 indetin juqtyrǵan medıtsına qyzmetkerleriniń sany -214, pnevmonııany 200 adam juqtyryp, 16 adam qaıtys bolǵan.
Búginde qaıtys bolǵan medıtsına qyzmetkerleriniń otbasyna 10 mln teńgeden jalpy 160 mln teńge kóleminde áleýmettik tólem jasalǵan.
Sonymen qatar, vırýs juqtyrǵan 182 mamanǵa barlyǵy 2 mln teńge kóleminde tólem berildi.
Epıdemııaǵa qarsy sharalarǵa tartylǵan 39 387 medıtsına qyzmetkerine tamyz aıyna deıin 7,8 mlrd teńge qarjylaı ústemeaqy tólendi.
