Koronavırýs: Túrkistan oblysynda qoǵamdyq kólikter qandaı talap saqtaýy tıis

TÚRKІSTAN. QazAqparat - Túrkistan oblysynyń Bas memlekettik-sanıtarııalyq dárigeri óńirde epıdemıologııalyq jaǵdaıdy turaqtandyrý maqsatynda qoǵamdyq kólikterge qatysty birneshe talap engizgen bolatyn. Koronavırýstyń taralýyna jol bermeý jónindegi vedomstvoaralyq komıssııa osy talaptardy eske salady, dep habarlaıdy QazAqparat.

Máselen, júrgizýshi kólik quralyn basqararda qolǵaptardy, medıtsınalyq maskalardy ýaqtyly (árbir 2 saǵat saıyn) aýystyryp otyrýy qajet. Qyzmet kórsetý ýaqyty aıaqtalǵannan keıin salon jeldetilip, terezeler, esik tutqalary, taıanyshtar, otyrǵyshtar dezınfektsııalyq sýlyqtarmen súrtilýi kerek. Sondaı-aq, jolaýshylardy qoǵamdyq kólikke otyrýǵa arnalǵan oryn sanynan aspaıtyn mólsherde mingizip, múmkindiginshe qolma-qol aqshasyz esep aıyrysý qamtamasyz etilýi qajet. Joǵary temperatýra, jótel, murynnyń bitelýi syndy belgileri bar personal jumysqa jiberilmeıdi. Óz kezeginde jolaýshylar salonǵa medıtsınalyq maskamen kirip, keminde 1 metr qashyqtyq saqtalýy tıis.

Ótken jyly Túrkistan oblysynda qalaaralyq, aýdanaralyq jolaýshylar tasymaly avtobýs jáne mıkroavtobýstardyń qatynasyn toqtatý týraly talaptardy oryndamaǵan, betperdelik rejımdi, áleýmettik ara qashyqtyqty, antıseptıkpen qamtamasyz etý jumystaryn saqtamaǵan 64 jaǵdaı anyqtaldy. Qaýly talaptaryn oryndamaǵandarǵa ákimshilik quqyq buzýshylyq týraly hattamalar toltyrylyp, 2 mln 944 myń tg aıyppul salynǵan.

Monıtorıngilik top 2021 jyldyń basynan beri betperdelik rejım men ara qashyqtyq saqtamaǵan 4 jaǵdaıdy anyqtady.