Koronavırýs týraly jalǵan habar taratqan 45 adam jaýapqa tartyldy
NUR-SULTAN. QazAqparat - QR Іshki ister mınıstri Erlan Turǵymbaev jalǵan habar taratqandardy jaýapqa tartý jumystary jóninde baıandady, dep habarlaıdy QazAqparat.
«Keı turǵyndardyń ádeıi jalǵan aqparat taratýy faktileri jalǵasýda. Feık jańalyq avtorlary naqty eldimekender men medıtsınalyq uıymdardyń atyn jazyp, aýrý juqtyryp, qaıtys bolǵandardyń sanyn oılap tabady jáne joq tyıymdardy aıtady. 25 naýryz kúni Kókshetaý qalasynda Koreıadan aýrý juqtyryp kelgen naýqastardyń Aqmola oblysynda jatqany týraly jalǵan habar taratqan top ustaldy», - dedi mınıstr Ortalyq kommýnıkatsııalar qyzmetinde ótken brıfıngide.
29 naýryzda Atyraý oblysynda áleýmettik jelide taralǵan 3 jalǵan aqparat tabyldy.
«Jalǵan áńgimelerdi taratý arqyly bul adamdar halyqty úreılendirip júr. Qazirgi ýaqytta jalǵan habar taratý boıynsha 45 fakti anyqtaldy. Barlyq kináliler tabylyp, sotqa deıingi tergeý júrip jatyr», - dedi E. Turǵymbaev.
Buǵan deıin mınıstr Almaty men Nur-Sultan qalalaryna zańsyz kirmek bolǵan 33 adam jaýapqa tartylǵanyn habarlaǵan edi.
Sondaı-aq, zańsyz shyǵarylyp, turǵyndarǵa qymbat baǵamen satylǵan 2 mln medıtsınalyq maska, 4 myń qorǵanys kostıými jáne 10 tonna dezınfektsııalyq qural aınalymnan alyndy.
