Koronavırýs týraly jalǵan aqparat taratqan Shymkent turǵyny keshirim surady
ShYMKENT. QazAqparat – Shymkent turǵyn qalada koronavırýspen aýyratyn naýqas anyqtaldy degen jalǵan aqparat taratqan.
Ol tipti órt-taktıkalyq oqý-jattyǵýy ótkizilip jatqan úlken saýda ortalyǵynan beınejazba túsirip, áleýmettik jeli arqyly taratqan, dep habarlaıdy QazAqparat tilshisi.
Qalalyq Polıtsııa departamentiniń málimetinshe, qazir osy oqıǵa boıynsha tergeý amaldary bastaldy.
«Ál-Farabı aýdandyq polıtsııa basqarmasynyń qyzmetkerleri Tótenshe jaǵdaılar departamenti tarapynan ótkizilgen jattyǵýlar kezinde «Shymkent Plaza« SOO-da koronavırýspen aýyratyn naýqas anyqtaldy» degen jalǵan aqparat taratqan qala turǵynyn ustady. Atalǵan jaıt sotqa deıingi tergep-tekserýdiń biryńǵaı tizilimine tirkeldi», delingen habarlamada.
Al, jurtty jalǵan habarymen qorqytqan turǵyn beınejazba arqyly qala turǵyndarynan keshirim suraǵan.
