Koronavırýs týraly ázildegen polıtseı jumystan qýyldy
QOSTANAI. QazAqparat – Synyptasymen birge qaljyń vıdeo túsirip, áleýmettik jelide taratqan Uzynkól aýdanynyń tártip saqshysy jumystan shyǵaryldy, dep habarlaıdy QazAqparat.
Oblystyq polıtsııa departamentiniń málimetinshe, Ershov aýyly ýchaskelik polıtsııa ınspektory synyptasymen birge 28 jyl buryn jasyrylǵan quty taýyp alǵan.
«Vıdeodan bóshkeniń spırtpen toltyrylǵanyn baıqaýǵa bolady. Olar spırttiń jartysyn órtep, koronavırýstyń jolamaıtynyn aıtyp, qaljyń vıdeo túsirgen. Keıin spırtti tógip tastaǵan. Al polıtseı túsirgen vıdeo áleýmettik jelilerde tarap ketti», - dep atap ótti polıtsııanyń baspasóz qyzmetindegiler.
Atalǵan fakti boıynsha qyzmettik tergeý júrgizilip, ýchaskelik ınspektor etıkalyq normalardy buzǵany úshin qyzmetinen bosatyldy.
