Koronavırýs: Tramp Eýropadan kelýshilerge AQSh-qa kirýge tyıym saldy
NUR-SULTAN. QazAqparat – Prezıdent Donald Tramp koronavırýstyń taralýyna jol bermeý úshin AQSh-tyń Eýropamen aradaǵy kez kelgen qatynasy, sonymen birge teńiz jáne áýe tasymalynyń 30 kúnge jabylatynyn jarııalady. Bul sharalar juma kúninen bastalady.
Tramp halyqqa koronavırýstyń taralýyna baılanysty arnaǵan úndeýinde «qatań, biraq qajetti shekteýler» koronavırýsty juqtyrýdyń 460 oqıǵasy tirkelgen Ulybrıtanııaǵa qatysty qoldanylmaıtynyn aıtty.
Sondaı-aq, Tramp kongresti koronavırýstyń AQSh ekonomıkasyna áserimen kúres aıasynda salyq júktemesin jeńildetý sharalaryn qoldanýǵa shaqyrdy.
Sársenbide Dúnıejúzilik densaýlyq saqtaý uıymy (DDSU) jańa koronavırýstyń taralýy pandemııa rejımine jetkenin jarııa etti.
Búginde AQSh-ta koronavırýs indetin juqtyrýdyń 1135 oqıǵasy tirkelgen, aýrýǵa shaldyqqan 38 adam qaıtys boldy.
Vırýstyń oshaǵy Nıý-Iork qalasynan soltústikke qaraı ornalasqan Nıý-Roshelde anyqtaldy. Jergilikti turǵyndarǵa kómek kórsetý úshin onda áskerıler jiberildi. Ulttyq gvardııa úılerinde qamaýda otyrǵan turǵyndarǵa azyq-túlik jetkizýde.
AQSh astanasy Vashıngtonda sársenbi kúni tótenshe jaǵdaı jarııalanǵan. 1000-nan astam adamnyń qatysýymen bolatyn jınalystar ótkizýge tyıym salyndy. Merııa jekelegen aýdandar men kvartaldarda karantın jarııalaýǵa quqyly. Aldaǵy bolatyn barlyq merekeler men festıvaldar toqtatyldy. TJ 31 naýryzǵa deıin engizilgen. Ázirge el astanasynda aýrý juqtyrýdyń 10 oqıǵasy tirkeldi.
