Koronavırýs tolqyndy jaǵdaımen kele jatyr - mınıstr Birtanov

NUR-SULTAN. QazAqparat - Koronavırýsty toqtatamyz desek - sanıtarlyq talaptardy saqtaýymyz qajet. Bul týraly QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Bul indet - áli bitken joq. Koronavırýs tolqyndy jaǵdaımen kele jatyr. Karantın jaǵdaıynda tómen túsedi. Biraq, karantın jáne shekteý sharalaryn alyp tastasaq - qaıta kóteriledi. Bul - tek Qazaqstanda emes, búkil dúnıejúzinde qaýipti jaǵdaı. Muny barlyǵymyz durys túsinýimiz qajet», - dedi mınıstr Ortalyq kommýnıkatsııalar qyzmetindegi brıfıng barysynda.

Onyń atap ótýinshe, dúnıejúzindegi osyndaı indetti toqtatýymyz úshin ár azamat, ár memleket karantındik, sanıtarlyq talaptardy engizýi jáne ony saqtaýy qajet.

«Eń birinshiden, ár adam 2 metr áleýmettik araqashyqtyqty saqtaýy kerek. Jumys ornynda jáne syrtqa shyqqanda áleýmettik araqashyqtyqty ustanǵanymyz jón. Ekinshiden, indetti toqtatý úshin qazirgi ýaqytta maska taǵý óte mańyzdy. Árıne, jeke gıgıenany da saqtaý qajet. Іndet aýamen ǵana emes, qol arqyly da juǵady. Sondyqtan qoldy jýý, jeke gıgıenany saqtaý da óte mańyzdy», - dedi Eljan Birtanov.