Koronavırýs: Teńiz kenishindegi naýqastar sany 102 adamǵa jetti
ATYRAÝ. QazAqparat –Atyraý oblysynyń Teńiz kenishindegi ınfektsııalyq statsıonarda emdelip jatqan naýqastar sany 102 adamǵa jetti, dep habarlaıdy QazAqparat.
Oblystyq densaýlyq saqtaý basqarmasynyń baspasóz qyzmeti taratqan aqparatqa qaraǵanda, ótken táýlikte 31 adamnyń koronavırýs ınfektsııasyna shaldyqqany PTR-test arqyly rastalyp otyr.
«Naýqastardyń beseýi Atyraý qalasynda anyqtaldy. Teńiz kenishinde 23 jumysshydan, Jylyoı aýdanynda 3 adamnan qaýipti indettiń belgisi tabyldy.
Sońǵy táýlikte koronavırýs ınfektsııasyn juqtyrǵandardyń basym bóligi kezekti medıtsınalyq tekseris kezinde anyqtalǵan. Naýqastardyń barlyǵynda ınfektsııa sımptomsyz túrde ótip jatyr» -dep habarlady basqarmanyń baspasóz qyzmeti.
Qazir 136 adam úı jaǵdaıynda emdelýde. Al, oblystyq ınfektsııalyq statsıonarda 32, aýdandardaǵy statsıonarda 8 naýqas emdelip jatyr. Teńiz kenishindegi ınfektsııalyq statsıonarda emdelip jatqan naýqastar sany 102 adamǵa jetken.
Eske sala ketelik, budan buryn Teńiz kenishindegi statsıonarda 86 naýqas emdelip jatqanyn habarlap edik.
