Koronavırýs: SQO-ǵa Katardan gýmanıtarlyq kómek jetti
PETROPAVL. QazAqparat – Soltústik Qazaqstan oblysyna Katardan jetken gýmanıtarlyq kómek – jeke qorǵanysh zattary óńirdiń emdeý mekemelerine bólip beriledi, dep habarlaıdy QazAqparat tilshisi.
SQO Sybaılas jemqorlyqpen kúres qyzmetiniń málimetinshe, Katar memleketinen 18 túrli jeke qorǵanysh zattary – barlyǵy 30 myńnan astam ónim jetkizildi. Bul kómek oblystaǵy 27 medıtsınalyq mekemege bólindi.
«Densaýlyq saqtaý basqarmasy gýmanıtarlyq kómekti bólý kezinde emdeý mekemesiniń suranysyn eskergen. Máselen, Covid-19 dıagnozy rastalǵan syrqattar jatqan birinshi qalalyq aýrýhanaǵa 30 arnaıy qorǵanysh kostıými, 170 dana hırýrgııalyq kostıým jáne 300 dana qorǵanysh kózildirigi berildi. Budan basqa maskalar da úlestirildi», - delingen vedomstvonyń baspasóz habarlamasynda.
Provızorlyq statsıonarlar men jedel járdem qyzmetterine de osyndaı kómek kórsetildi. https://www.youtube.com/watch?v=-FWgGs2BUgo
Birer kúnde SQO-ǵa gýmanıtarlyq kómek Reseıdiń Túmen oblysynan da jetpek. Túmen oblysy qazaqtarynyń ulttyq-mádenı avtonomııasynyń prezıdenti Esenǵalı Ibraev óziniń áleýmettik jelidegi paraqshasynda kórshi oblysqa kómektesý úshin medıtsınalyq maskalardy, qolǵaptardy, antıseptıkterdi satyp alyp jatqandaryn jazdy.
«Muny nege jazyp otyr degen suraqqa jaýap bereıin: áleýmettik jelide bizdiń aqparatty oqyp, Qazaqstannyń kásipkerleri habarlasty, aktsııaǵa qosylyp, kómekteskileri keletindigin aıtty. Olar ókpeni jasandy jeldetý apparattaryn satyp alýǵa qarjy bólýge daıar. Bizdi uıymdastyrýshylyq jumystardy qolǵa alýdy, ıaǵnı qujattary saı keletin sapaly medtehnıkany jetkizýshilerdi taýyp, apparattardy satyp alyp, SQO-ǵa jetkizýdi surady», - deıdi Esenǵalı Ibraev.
