Koronavırýs: SQO-da ınfektsııalyq oryndar sany 400-ge arttyryldy

PETROPAVL. QazAqparat – Soltústik Qazaqstan oblysynda koronavırýs juqtyrǵan 5 júkti áıeldiń jaǵdaıy ortasha dárejede, dep habarlaıdy QazAqparat tilshisi.

SQO Densaýlyq saqtaý basqarmasy baspasóz qyzmetiniń málimetinshe, indet bastalǵaly óńirde 556 júkti áıel koronavırýs juqtyrdy. Olardyń 545-i táýir bolsa, qalǵan 11-i dárigerlerdiń baqylaýynda. Jaǵdaıy orta dárejedegi 5 áıel statsıonarda em alyp jatyr. Syrqattanǵan júkti áıelderdiń arasynda 88-iniń aýrýy ýshyǵyp, ókpeleri qabyndy. Qazir olardyń barlyǵynyń jaǵdaılary jaqsy.

Jalpy SQO-da ótken aptada 122 adam koronavırýs juqtyrdy. Osylaısha óńirde aýyrǵandar sany 25 818-ge jetti. Syrqattar sanynyń artýyna baılanysty ınfektsııalyq statsıonarlardaǵy oryn sany 1200-den 1600-ge deıin kóbeıtildi. Qazirgi ýaqytta munda 678 adam em alyp jatyr. Statsıonar 42% júktelgen. Qaıtys bolǵandardyń sany ótken táýlikte úsheýge artyp, 240-qa jetti.