Koronavırýs: SQO-da 6 myń jas ananyń 2,5 myńy ǵana egildi
Byltyr perınataldyq ortalyq dárigerleri koronavırýs ınfektsııasynan 670 júkti áıeldi emdegen. Olardyń 270-inde dert asqynyp, pnevmonııaǵa ulasqan. 205 áıeldi aman alyp qalý úshin merziminen buryn bosandyrýǵa týra keldi.
«Pnevmonııa bolǵan 52 áıeldi erte bosandyrdyq, 64 áıel ókpeni jasandy jeldetý apparatynda uzaq ýaqyt boldy. Olardyń eki ókpesi de qabynǵan, jaǵdaılary óte aýyr boldy. Ózdiginen demala almady. Sondyqtan biz olardy apparatqa qosýǵa májbúr boldyq. Keıin ajyratqannan keıin de bul áıelderdi taǵy bir aı boıy koronavırýstan emdedik», - deıdi SQO perınataldyq ortalyq dırektory Elena Kalıýjnaıa.
Koronavırýs juqtyrǵan júkti áıelderdi jáne olardyń ishtegi sharanasyn aman alyp qalý úshin kóp jaǵdaıda kesar tiligimen merziminen erte bosandyrylady. Alaıda bul da oń nátıje bere bermeıdi eken.
«Byltyr 9 áıel ómir men ólim aýzynda boldy. Olardy biz 24 saǵat boıy baqylaýǵa aldyq. Syrqattardyń bireýin reanımobılmen Kardıologııa ortalyǵyna jetkizýge týra keldi. Ol jerde EKMO – ekstrakorporaldy membranalyq oksıgenatsııa apparaty bar. Qondyrǵy arqyly qan tamyrlar ottegimen baıytylady. Ol apparat bolmasa syrqattan aıyrylar edik. 41 kún jatyp, beti beri qarady. Ózi de, balasy da aman-esen úılerine jiberildi. Biraq, ókinishke oraı 9 áıeldiń ekeýiniń ómirine arasha túse almadyq. Olar bizge óte kesh tústi, ókpeleri 90 % zaqymdanǵan. Biz aman alyp qalý úshin qolymyzdan kelgenniń bárin jasadyq, kesar tiligimen bosandyryp aldyq. Sábıleri aman, biraq olardyń analary qaıtys boldy. Ekeýi de aýdan turǵyndary, jas kelinshekter. Bul áıelderdiń barlyǵy da vaktsına almaǵan», - deıdi Elena Kalıýjnaıa.
Júkti áıelderdi aman alyp qalý úshin óte erte merzimde bosandyrýǵa týra kelgen, saldarynan 3 shaqalaq kóz jumdy. Dárigerdiń aıtýynsha, shaqalaqtardyń salmaǵy óte kishkentaı bolǵan, mamandar qansha tyrysqanymen, olardy aman alyp qala almady.
«Biz áıelderdi, jas analardy vaktsına saldyrýǵa májbúrleı almaımyz. Tek keńes beremiz. Koronavırýsqa qarsy ekpe saldyrý óz nátıjesin berip jatyr. Aýrý jeńil ótedi, al ishtegi sharanaǵa keri áseri joq. Vaktsına júkti áıelderge 16 aptadan bastap qoıylady. Bul ýaqytta sharana jetilgen, uryqjoldasy ony túrli vırýstardan qorǵap turady. Pfizer vaktsınasyn álem elderi qoldanady, sondyqtan qoryqpańyzdar.
Ekpe saldyrǵannan keıin aǵzada antıdene paıda bolady. Bul qorǵanysh beredi. Muny biz is júzinde kórip otyrmyz. Bıylǵy 2 aıda 263 júkti áıeldi emdedik, sonyń 60-y ambýlatorııalyq em qabyldady. Olar júktilikke deıin jáne júktilik barysynda ekpe saldyrǵandar. 106 áıelde pnevmonııa boldy, olardy statsıonarǵa jatqyzdyq. Taǵy úsh áıeldi ókpeni jasandy jeldetý apparatyna qostyq», - deıdi perınataldyq ortalyq dırektory.
Mamannyń aıtýynsha, búginge deıin SQO-da 402 júkti áıel ǵana ekpe saldyrǵan. Al 6 myńnan astam jas ana vaktsınalanýy tıis bolsa, sonyń 2,5 myńy ǵana koronavırýsqa qarsy ımmýndalǵan.
