Koronavırýs: Shymkenttegi statsıonardyń birinen sońǵy naýqas jazylyp shyqty

ShYMKENT. QazAqparat – Shymkenttegi provızorlyq statsıonardyń birinen koronavırýs ınfektsııasyna shaldyqqan sońǵy naýqas jazylyp shyqty. Búginge deıin bul ortalyqta 400-ge jýyq adam em qabyldap, dertinen aıyqqan bolatyn, dep habarlaıdy QazAqparat tilshisi.

Qalalyq densaýlyq saqtaý basqarmasynyń málimetinshe, Maqpal Tastanova esimdi naýqas T.Orynbaev atyndaǵy gıperbarııalyq oksıgenatsııa ortalyǵyna 19 tamyz kúni jedel járdem qyzmetimen jetkizilgen. Tekserý barysynda onyń eki jaqty vırýsty pnevmonııaǵa shaldyqqany anyqtalǵan. Dárigerler naýqastyń jaǵdaıyn baıqap, birden em-dom sharalaryn júrgizgen. Ýaqyt óte kele kópbalaly ananyń densaýlyǵy jaqsaryp, arnaıy statsıonardan shyǵaryldy.

«Ortalyqtyń barsha dárigerine alǵysym sheksiz. Balalarymdy qatty saǵyndym. Endi otbasymmen aman-esen qaýyshatyn boldym», - deıdi ol.

Aıta keteıik, T.Orynbaev atyndaǵy gıperbarııalyq oksıgenatsııa ortalyǵy juqpaly dert órshigen tusta prozızorlyq statsıonar retinde naýqastardy qabyldaı bastady. Endigi medıtsınalyq uıym shtattyq rejımdegi jumysyn jalǵastyratyn bolady.