Koronavırýs: Shrı-Lanka men Qyrǵyzstan azamattary Almaty áýejaıynan deportatsııalandy

NUR-SULTAN. QazAqparat – 15 jeltoqsanda Qazaqstan Respýblıkasynyń aýmaǵyna Izraıl, Ulybrıtanııa, Germanııa, Frantsııa, Ońtústik Koreıa, Maldıv Respýblıkasy, Mysyr, Túrkııa, BAÁ, Reseı, Qyrǵyzstan jáne Ózbekstannan 13 halyqaralyq áýe reısi kelip qondy. QazAqparat bul týraly QR DSM Sanıtarııalyq-epıdemıologııalyq baqylaý komıtetiniń baspasóz qyzmetine silteme jasap habarlaıdy.

13 halyqaralyq áýe reısimen Qazaqstanǵa barlyǵy 1 612 jolaýshy ushyp kelgen. Olardyń ishinde PTR-testileýdiń teris nátıjesi bar anyqtamamen 1 465 adam, anyqtamasyz 147 adam (QR azamattary) kelgen. Atap aıtqanda, Almaty qalasynyń áýejaıyna 10 reıspen 1 348 jolaýshy (anyqtamamen - 1 209, anyqtamasyz – 139), Nur-Sultan qalasynyń áýejaıyna 3 reıspen 264 jolaýshy (anyqtamamen - 256; anyqtamasyz – 8) kelgen.

«Anyqtamasyz kelgen Qazaqstan azamattary kelgen jeri boıynsha COVID-19-ǵa PTR-taldaý ádisimen testileýden ótti. Karantındik statsıonarlarda óz nátıjelerin kútip jatyr. Bir kún buryn, 2020 jyldyń 14 jeltoqsanynda anyqtamasyz kelgen 81 adamnyń PTR-taldaý nátıjeleri boıynsha Ystanbul – Almaty reısimen ushyp kelgen Qazaqstannyń 2 azamatynan koronavırýs ınfektsııasy anyqtaldy», - delingen habarlamada.

Sonymen qatar, Túrkııadan ushyp kelgen Shrı-Lanka men Qyrǵyzstan azamattarynda koronavırýsqa test anyqtamalarynyń merzimi ótýine baılanysty Almaty qalasynyń áýejaıynan deportatsııalandy.