Koronavırýs: ShQO statsıonarlaryndaǵy tósek-oryn qory 15,8 paıyzǵa júktelgen

ÓSKEMEN. QazAqparat – Shyǵys Qazaqstan oblysyndaǵy koronavırýs juqtyrǵan naýqastar emdeletin statsıonarlardaǵy tósek-oryn qory 15,8 paıyzǵa júktelgen, dep habarlaıdy QazAqparat tilshisi.

ShQO Densaýlyq saqtaý basqarmasy baspasóz qyzmetiniń málimetine súıensek, óńirde sońǵy táýlikte COVID-19 ınfektsııasyn juqtyrǵan 67 adam tirkeldi. Onyń ishindegi 50 naýqasta sımptom bar bolsa, 17 adam syrqatty sımptomsyz ótkerýde.

«Bir kúnde 31 patsıent koronavırýstan tolyqtaı saýyǵyp shyqty. Qazirgi ýaqytta oblys boıynsha statsıonar jaǵdaıynda 318 naýqas em-dom qabyldap jatyr. Jalpy Shyǵys Qazaqstandaǵy statsıonarlarda tósek-oryn júktemesi – 15,8 paıyzdy quraıdy», - delingen aqparatta.

Esterińizge sala ketsek, osyǵan deıin Qazaqstanda ótken táýlikte 1349 adamnan koronavırýs anyqtalǵany habarlanǵan.