Koronavırýs: ShQO-da naýqastarǵa nemquraıly qaraǵan dárigerler jumystan shyǵaryldy

ÓSKEMEN. QazAqparat – Shyǵys Qazaqstan oblysynda koronavırýs juqtyrǵan naýqastarǵa nemquraıly qaraǵan dárigerler jumystan shyǵaryldy, dep habarlaıdy QazAqparat tilshisi.

Shyǵys Qazaqstan oblysynyń ákimi Danıal Ahmetov qala, aýdan ákimderimen jáne Densaýlyq saqtaý basqarmasynyń basshysymen koronavırýsqa qarsy kúres máselesi boıynsha keńeıtilgen otyrys ótkizdi.

«Qazirgi ýaqytta óńirimiz vırýs juqtyrý kórsetkishi boıynsha «sary aımaqta» tur. Sońǵy kúnde qaýipti dertke shaldyqqan 117 naýqas tirkeldi, onyń basym kóbisi – Óskemen turǵyndary. Bul indettiń delta shtamynyń joǵary deńdeıde juqpaly bolýyna baılanysty», - dedi aımaq basshysy.

Onyń aıtýynsha, ekpe saldyrý kórsetkishi boıynsha óńir Qazaqstanda jetekshi oryn alady. Búginde vaktsınanyń alǵashqy komponenti 770 myńǵa jýyq adamǵa egilgen.

«Ókinishke qaraı, maǵan áleýmettik jelide naýqastarǵa tıisti kóńil bólmeıtin, óz qyzmetine uqypsyz qaraıtyn keıbir dárigerler týraly jıi shaǵymdanyp jatady. Tekserý júrgizilgennen keıin Glýbokoe jáne Shemonaıha aýdandyq aýrýhanalaryndaǵy, Óskemendegi № 2 emhanasyndaǵy dárigerler óz qyzmetterinen bosatyldy. Olardyń ornyna kásibı mamandar kelýi kerek», - dedi Danıal Ahmetov.