Koronavırýs: «Shapaǵat» ortalyǵyndaǵy eki qart aýyr halde jatyr
NUR-SULTAN. QazAqparat - QR Densaýlyq saqtaý vıtse-mınıstri Lázzat Aqtaeva «Shapaǵat» áleýmettik qyzmet kórsetý ortalyǵyndaǵy ınfektsııa juqtyrý jaǵdaıy týraly pikir bildirdi, dep habarlaıdy QazAqparat tilshisi.
Buǵan deıin Aqmola oblysyndaǵy «Shapaǵat» áleýmettik qyzmet kórsetý ortalyǵyndaǵy koronavırýs ınfektsııasy tabylǵany habarlanǵan edi.
«Ortalyq qamqorlyǵynda 147 qart jáne 74 qyzmetker bolǵan. Onda koronavırýs ınfektsııasy shyǵyp, 3 adam qaıtys bolǵan soń, baılanysta bolǵan 221 adam anyqtaldy. Onyń 147-i - qarttar, 74-i — qyzmetkerler», - dedi vıtse-mınıstr Ortalyq kommýnıkatsııalar qyzmetinde ótken brıfıngte.
Barlyǵyna polımerazdy-tizbekti reaktsııa ádisimen koronavırýs ınfektsııasyn tekserý júrgizilgen. Nátıjesinde, 38 qart pen 3 qyzmetkerden ınfektsııa tabylǵan.
«Infektsııa anyqtalǵan adamdar Nur-Sultan qalasy (8) men Arshaly (27) aýdandyq aýrýhanasyna jatqyzyldy. Qyzmetkerlerdiń ekeýi Kókshetaýda, bireýi - Nur-Sultanda emdelip jatyr. Eki qart aýyr halde jatyr, onyń biri ókpeni jasandy jeldetý apparatyna qosylǵan jáne ekinshisine ottegi beretin qurylǵy taǵyldy»,- deıdi L. Aqtaeva.
Onyń aıtýynsha, qalǵan naýqastardyń da aýyr jaǵdaıy olardyń negizgi aýrýyna baılanysty bolyp otyr. Máselen, 51 naýqas buǵan deıin de arbada otyrǵan.
«Epıdemııalyq tergeý júrgizilip, aýrý oshaǵy anyqtaldy. Ol - ortalyqtyń qyzmetkeri. Ortalyqtaǵy barlyq adam karantınge nemese statsıonarlarǵa jiberilip, dezınfektsııalyq jumystar júrgizildi», - dedi Lázzat Aqtaeva.
