Koronavırýs: Saılaý naýqanynda qandaı saqtyq sharalary qabyldanady

NUR-SULTAN. QazAqparat - Elimizdiń joǵary zań shyǵarýshy organynyń tómengi palatasy - Májilis pen jergilikti máslıhat depýtattaryn saılaý jaqyndaı túsýde. Osyǵan oraı jurtshylyqty saıası naýqan kezeńinde álemdi ábigerge salyp otyrǵan koronavırýstan saqtaný sharalary alańdatyp otyrǵany belgili. Iá, indettiń beti qaıtar emes. Alys-berisimiz jaqyn kórshi Reseıdiń ózinde bir kúnde 20 myńnan astam adamnan vırýs anyqtalyp otyr. Elimizde de táýlik ishinde 588 adamnyń koronavırýsqa shaldyqqany belgili. Mine, osyndaı jaǵdaıda qalaǵan kandıdatyna daýys berýge nıetti saılaýshynyń kóńilinde kúdik uıalaıtyndyǵy anyq.

Biraq, qaýip bar bolsa da, alańdaýǵa negiz joq. Óıtkeni, saılaýdyń uıymdastyrylýyna, óz deńgeıinde ótýine jaýapty elimizdiń Ortalyq saılaý komıssııasy Densaýlyq saqtaý mınıstrligimen birlese otyryp, «Qazaqstan Respýblıkasy Parlamenti Májilisiniń jáne máslıhattarynyń depýtattyǵyna kandıdattardy usyný jáne tirkeý kezeńinde COVID-19 koronavırýs ınfektsııasynyń taralýynyń aldyn alý jónindegi usynymdar» ázirlep otyr.

«Saılaý protsesine qatysýshylardyń densaýlyǵy men ómiriniń qaýipsizdigin qamtamasyz etý - saılaý naýqanynyń eń mańyzdy aspektileriniń biri», - degen edi QR Ortalyq saılaý komıssııasynyń tóraǵasy Berik Imashev.

Aıta keterligi, elimizdiń basty saıası naýqanyna «Aq jol» Qazaqstannyń demokratııalyq partııasy, «Aýyl» halyqtyq-demokratııalyq patrıottyq partııasy, «Birlik» («Adal») saıası partııasy, Jalpyulttyq sotsıal-demokratııalyq partııasy, Qazaqstannyń Kommýnıstik halyq partııasy (Qazaqstannyń halyq partııasy) jáne «Nur Otan» partııasy Qazaqstan Respýblıkasy Parlamenti Májilisiniń jáne máslıhat depýtattaryn saılaýǵa qatysatyny belgili.

Dál osy saıası uıymdar ózderi ótkizetin túrli sharalar kezinde koronavırýstyń taralýyna jol bermeýdiń naqty áreketin jasaýǵa mindetti. Muny QR OSK tóraǵasy da aıtyp otyr.

«Osyǵan baılanysty saıası partııalar ókilderiniń nazar aýdarýyn suraımyn. Depýtattyqqa kandıdattar usyný jónindegi is-sharalardy uıymdastyrý jáne ótkizý kezeńinde jaýapkershilik sharalaryn uıymdastyrýshylarǵa júkteledi. Sondaı-aq aýmaqtyq saılaý komıssııalarynyń partııalyq tizimdi tirkeýdi júrgizý kezinde barlyq qajetti densaýlyq saqtaý sharalarynyń qamtamasyz etilýi qajet ekendigine nazar aýdartamyn», - dedi Berik Imashev.

Joǵaryda QR OSK men Densaýlyq saqtaý mınıstrligi saılaý naýqany kezinde COVID-19 koronavırýstyq ınfektsııasynyń taralýynyń aldyn alý jónindegi usynymdar ázirlegenin aıtqan edik. Endi soǵan toqtalsaq.

QR Densaýlyq saqtaý vıtse-mınıstri - Bas memlekettik sanıtar dáriger Erlan Qııasovtyń aıtýynsha, saılaý protsesiniń depýtattyqqa kandıdattardy usyný jáne tirkeý kezeńinde maska rejımin mindetti túrde saqtap, bir rettik qolǵap kıgen jón.

Sonymen qatar qoldy zalalsyzdandyrý maqsatynda antıseptıkti jıi qoldanyp, adamdar arasynda áleýmettik araqashyqtyq saqtaý da mańyzdy.

Munan bólek, qol alysyp amandasýdan, tikeleı qarym-qatynastyń ózge de formalarynan múmkindiginshe aryla turǵan durys.

«QR Parlamenti Májilisi men máslıhattar depýtattyǵyna kandıdattardy usyný kezeńinde sezder, konferentsııalar jáne otyrystar ótkizý barysynda baılanyssyz termometr quraldarynyń kómegimen qatysýshylardyń dene qyzýyn ólsheý, sezder, konferentsııalar men otyrystar ótkizýdiń búkil kezeńi ishinde sharaǵa qatysýshylardyń barlyǵynyń maska rejımin saqtaýy usynylady. Sharaǵa qatysýshylardy zalǵa otyrǵyzǵan kezde áleýmettik ara qashyqtyń saqtalýyn qamtamasyz etý qajet. Tıisti qujattardy toltyrý jáne qol qoıý barysynda jeke qalamsap paıdalaný kerek. Ǵımarattyń tehnıkalyq múmkindigi bolǵan jaǵdaıǵa oryn-jaıǵa kirý jáne shyǵý esikteri jeke-jeke bolýy tıis», - dedi Bas memlekettik sanıtar dáriger.

Onyń atap ótýinshe, joǵaryda atalǵan jıyndar ótetin oryn-jaıda jasandy ventılıatsııa júıesi bolmaǵan kezde bólme aýasyn turaqty túrde jeldetip otyrýǵa keńes beriledi.

Sonymen qatar ǵımaratqa kireberiste jáne ishinde ara qashyqtyq belgileri ornatylyp, búkil oryn-jaı zalalsyzdandyratyn jýý quraldarymen únemi tazartylyp otyrýy tıis.

Sondaı-aq oryn-jaıǵa kire beriste koronavırýs ınfektsııasynyń aldyn alý sharalary týraly aqparattyq materıaldar ornalstyrylyp, zalǵa kire beris holda qoldy tazartýǵa arnalǵan antıseptık bar sanıtaızerler ornatylýy qajet.

Qatysýshylardyń áleýmettik ara qashyqtyq saqtaýyn baqylap júretin jaýapty adamdy belgileý de artyq etpeıdi. Sharanyń barlyq qatysýshylaryna PTR testileý ádisimen koronavırýs ınfektsııasyna arnalǵan zerthanalyq tekserýden aldyn ala ótýge keńes beriledi.

Bul rette test sharanyń bastalýyna 72 saǵat ýaqyt qalǵannan keıin ǵana tapsyrylǵany durys. Al zerthanalyq tekserýdiń oń nátıjesi bar azamattardy ǵımaratqa kirgizbegen jón.

Depýtattyqqa kandıdattardy usyný sharalaryn uıymdastyrý jáne ótkizý kezeńinde azamattardyń densaýlyǵyn qorǵaý men olardyń sanıtarlyq-epıdemıologııalyq qaýipsizdigin qamtamasyz etý jaýapkershiligi jıyndy ótkizýshilerge júkteledi.

«Saılaý komıssııalaryna jumystaryn uıymdastyrý barysynda mynadaı sanıtarlyq-epıdemıologııalyq sharalardy saqtaý usynylady. Eń aldymen saılaý komıssııalary jumysynyń búkil kezeńinde komıssııanyń barlyq múshelerin qoldy antıseptıkalyq quraldarmen zalalsyzdandyrýdy qamtamasyz etýi tıis. Saılaý komısııalary ǵımarattaryna kireberiste sanıtaızerler bolýy jáne turaqty túrde tazalaý jumystary júrgizilýi kerek. Jıhazdar men tehnıkalyq qural-jabdyqtar bir-birinen keminde 1,5-2 metr ara qashyqtyqta ornalastyrýy tıis. Saılaý qujattarymen jumys isteý barysynda qaýipsizdik sharalary saqtalýy qajet. Saılaý qujattaryn toltyrý jáne olarǵa qol qoıý barysynda jeke qalamsap paıdalaný usynylady», - dedi QR Densaýlyq saqtaý-vıtse-mınıstri.

Jalpy, Qazaqstannyń Ortalyq saılaý komıssııasy usynǵan derekterge sáıkes, Májilis saılaýynda saılaýshylar tizimine kirgizilgen azamattardyń sany 11 820 318 adamdy quraıdy.

18 jasqa tolǵan, áreketke qabiletti, bas bostandyǵynan aıyrý oryndarynda otyrmaıtyn respýblıkanyń belsendi saılaý quqyǵy bar saılaýshylardyń turǵylyqty jeri boıynsha tizimin tıisti jergilikti atqarýshy organ jasaıdy.

Májilis pen máslıhat depýtattaryn saılaýǵa oraı elimizdiń 14 oblysynda jáne respýblıkalyq mańyzy bar Almaty, Shymkent, Nur-Sultan qalalarynda 10 myńnan astam, sonymen qatar álemniń 51 memleketinde 66 saılaý ýchaskesi ashylady.

Atalǵan 10 myńnan astam ýchaskeniń ishinde demalys úılerinde, sanatorıılerde, turaqty emdeý-profılaktıkalyq mekemelerinde, shalǵaıdaǵy jáne qatynasýy qıyn aýdandarda ornalasqan azamattar turatyn jerlerde, alys mal sharýashylyǵy ýchaskelerinde, tergeý ızolıatorlary men ýaqytsha ustaý ızolıatorlarynda, Qazaqstan Respýblıkasyna tıesili jáne saılaý kúni júzýde júrgen kemelerde, áskerı bólimderde qurylǵan 558 ýchaske de bar.

Al shetelde ashylatyn saılaý ýchaskesinde sol memlekette turatyn nemese uzaqmerzimdi sheteldik issaparda júrgen jáne respýblıka azamatynyń jaramdy pasporty bar barlyq azamattar daýys bere alady.

Aıta keteıik, QR Ortalyq saılaý komıssııasynyń kezekti saılaýdy daıyndaý jáne ótkizý jónindegi negizgi is-sharalar kúntizbelik josparlaryna sáıkes, partııalyq tizimder boıynsha saılanatyn Qazaqstan Respýblıkasy Parlamenti Májilisiniń depýtattaryn usyný 2020 jylǵy 10 qarashada bastalyp, 2020 jylǵy 30 qarashada jergilikti ýaqyt boıynsha saǵat 18-de, máslıhat depýtattaryn usyný 2020 jylǵy 10 qarashada bastalyp, 2020 jylǵy 4 jeltoqsanda jergilikti ýaqytpen saǵat 18-de aıaqtalady.

Partııalyq tizimderdi tirkeý 2020 jylǵy 10 qarashada bastalyp, 2020 jylǵy 10 jeltoqsanda jergilikti ýaqytpen saǵat 18:00-de bitedi.