Koronavırýs saldarynan qonaqúıge kelýshiler sany eki esege qysqarǵan
NUR-SULTAN. QazAqparat – 2020 jyldyń qańtar-jeltoqsan aılarynda qonaqúı, demalys úıleri, motel jáne sol sekildi basqa da oryndardyń qyzmet kórsetýi 47,4 mlrd teńgeni qurap, byltyrǵy jylmen salystyrǵanda 48,5%-ǵa tómendedi, dep habarlaıdy QazAqparat RANKING.KZ portalyna silteme jasap.
Sektordaǵy ÓÓI (Ónerkásiptik óndiris ındeksi) eki esege qysqaryp, bar bolǵany 50,2%-ǵa jetken.
Byltyrǵy jyldyń osy kezeńinde kórsetkish 92,1 mlrd teńgeni qurap, bir jyl burynǵy kórsetkishten 16,6%-ǵa asyp túsken bolatyn.
Ornalastyrý oryndary boıynsha qyzmet kórsetýdiń tórtten biri Almatyǵa tıesili: úsh toqsanda 11,5 mlrd tg, bir jyl burynǵymen salystyrǵanda eki ese az. Úzdik úshtiktiń qatarynda elorda (8 mlrd tg, mınýs 58,5%) men Aqmola oblysy (4,5 mlrd tg, mınýs 22,9%) bar.
Soltústik Qazaqstan eń az qyzmet kórsetken oblys: 450,7 mln tg, jylyna mınýs 53,4%.
Jyl basynan beri qonaqúı, motel, kempıng, týrıstik bazalar jáne basqalary 2,6 mln adamdy qabyldaǵan. Bir jyl burynǵymen salystyrǵanda 47,5% az.
Qonaqtardyń kóbi meıramhanasy bar qonaqúılerge toqtaǵan: 1,1 mln adam, jylyna mınýs 48,1%. Taǵy 799,1 myń adam meıramhanasy joq qonaqúılerdi tańdasa, 437,7 myń adam bir qabatty býngalo, saıajaı, kottedj ben páterlerge turaqtaǵan. Qonaqúı nómirleri 19,3%-ǵa tolǵan, bir jyl buryn bul kórsetkish 27% bolǵan.
Bir tósek-orynnyń ortasha baǵasy – 7,6 myń teńge, jylyna 7,7%-ǵa qymbattaǵan.
2020 jyldyń qarashasy boıynsha qonaqúı qyzmetiniń baǵasy 1,8%-ǵa ǵana ósken. Baǵa Pavlodar oblysynda aıtarlyqtaı artqan: jylyna 16,3%. Sondaı-aq alty óńirde baǵalar 1,2-6,7% aralyǵynda ósken. Atyraý oblysynda baǵa, kerisinshe, 7,4%-ǵa tómendedi. Basqa óńirlerde ózgerissiz qaldy.
Aldaǵy merekelerde shamamen 10 myń qazaqstandyq jyly aımaqtarǵa joldama satyp alǵan. Túrkııa, Egıpet pen BAÁ syndy tanymal baǵyttarǵa endi Maldıv araldary qosyldy.
Kúzde 24 myń qazaqstandyq shetelde demaldy. Tamyzdan beri Qazaqstan azamattary shetelge 42 myń joldama satyp alǵan. Olardyń jartysynan kóbi saıahatqa kúz mezgilinde attanǵan. Bul byltyrǵy jyldyń osy kezeńimen salystyrǵanda eki ese kóp.
