Koronavırýs saldarynan elorda bıýdjetine 47 mlrd teńge túspeýi múmkin - ákim

NUR-SULTAN. QazAqparat – Pandemııa kezeńinde Nur-Sultan qalasynyń ákimdigi 43 mıllıard teńgeni ońtaılandyryp, qajetti salalarǵa baǵyttady. Bul týraly Nur-Sultan qalasynyń ákimi Altaı Kólginov aıtyp berdi, dep habarlaıdy QazAqparat tilshisi.

«Pandemııanyń jaǵymsyz saldary boldy, ásirese odan shaǵyn jáne orta bıznes zardap shekti. Jergilikti bıýdjetke te jyl basynda boljanǵan túsimder tolyq túspeýi múmkin. Memleket ShOB sýbektilerin qoldaý úshin jeńildikter jasady, sondyqtan jyl sońyna qaraı shamamen 47 mlrd teńge bizdiń bıýdjetke túspeýi múmkin. Korporatıvti tabys salyǵy boıynsha da jyl basynda tólenýi tıis 10 mlrd teńgeden astam qarajat túspeýi múmkin. Osyǵan baılanysty, Memleket basshysynyń tapsyrmasymen Nur-Sultan ákimdiginiń jergilikti bıýdjetin 43 mıllıard teńgege ońtaılandyrdyq», - dedi ákim Ortalyq kommýnıkatsııalar qyzmetinde ótken brıfıngte.

Únemdelgen qarajat eń aldymen COVID-19 indetimen kúreske, densaýlyq saqtaý júıesin damytýǵa, dári-dármek pen medıtsınalyq jabdyqtar satyp alýǵa jumsalǵan.

«Bilim berý júıesin damytýǵa da kóńil bóldik, sebebi qashyqtan oqytý formaty úshin az qamtylǵan otbasy balalaryna noýtbýkter men roýterler qajet boldy. Ári qaraı áleýmettik kómek kórsetýge, ekonomıkanyń naqty sektoryn qoldaýǵa, ınfraqurylymdy damytyp, turaqtandyrý qoryn toltyrýǵa mán berdik.

Jalpy alǵanda elordanyń áleýmettik-ekonomıkalyq kórsetkishteri oń nátıje kórsetip otyr. Pandemııaǵa qaramastan, júrgizilgen memlekettik sharalardyń arqasynda, negizgi kapıtalǵa 1 trln teńge ınvestıtsııa túsedi dep boljap otyrmyz. Salystyrar bolsaq, 2019 jyly 900 mlrd teńgeden astam qarajat túsken edi», - dedi Altaı Kólginov.