Koronavırýs saldarynan bıýdjet qansha qarjy joǵaltýy múmkin

NUR-SULTAN. QazAqparat – Pandemııa saldarynan salyq túsimderi boıynsha 1,1 trln teńge kem jınalýy múmkin. Bul týraly Ortalyq kommýnıkatsııalar qyzmetinde QR QM Memlekettik kirister komıtetiniń tóraǵasy Marat Sultanǵazıev málim etti, dep habarlaıdy QazAqparat tilshisi.

Baspasóz máslıhatynda koronavırýs indetiniń memlekettik qazynanyń salyq túsimderine áseri jaıynda suraldy.

«9 aıda shamamen 1 trln 100 mlrd teńge qarjy joǵalttyq dep baǵaladyq. Sonymen qatar, mıkro jáne shaǵyn bızneske jeńildikter, tólemdi keıinge shegerý jáne basqa da qoldaý túrleri 1,5 trln somasynda jasaldy», - dedi M. Sultanǵazıev.

Onyń sózine qaraǵanda, bıylǵy 9 aıda memlekettik bıýdjettiń kiristeri jónindegi jospary 92 paıyzǵa, respýblıkalyq bıýdjet 82 paıyzǵa, jergilikti bıýdjet 116 paıyzǵa oryndaldy. Respýblıkalyq bıýdjetke túsimderiniń tómendeýine pandemııamen baılanysty syrtqy jáne ishki faktorlar áser etti. Dúnıejúzilik banktiń derekteri boıynsha bazalyq boljamǵa sáıkes, bıyl álemdik jalpy ishki ónim 5,2 paıyzǵa qysqarady dep kútilýde.

«Qazaqstannyń kórsetkishterine toqtalsaq, úshinshi eldermen taýar aınalymy jyl basynan beri 13 paıyzǵa tómendedi», - dedi komıtet basshysy.