Koronavırýs: «Rolan Garros» týrnıri kúzde ótetin boldy
NUR-SULTAN. QazAqparat – Koronavırýs qaterine baılanysty «Rolan Garros» týrnıri keıinge shegerildi, dep habarlaıdy QazAqparat tilshisi.
Frantsııa ashyq chempıonatynyń baspasóz qyzmeti málim etkenindeı, «Rolan Garros» jarysy 20 qyrkúıek pen 4 qazan aralyǵynda ótetin boldy.
Atalmysh doda bıyl 18 mamyrda bastalýy tıis edi. Alaıda uıymdastyrýshylar karantındik sharalarǵa baılanysty bul ýaqytta ótkizýden qaýiptenýde.
«Bul qazirgideı qıyn kezde biz qabyldaǵan kúrdeli de batyl sheshim boldy. Densaýlyq pen qaýipsizdik úshin kúreste bir bolyp, bárine jaýapkershilikpen qaraýymyz kerek», dedi Frantsııa tennıs federatsııasynyń prezıdenti Bernar Gýdıchellı.
Osylaısha «Rolan Garros» týrnıri Metts (Frantsııa), Sankt-Peterbýrg (Reseı), Sofııa (Bolgarııa), Chjýhaı jáne Chendý (Qytaı) jarystarymen bir kezde ótetin boldy. Osy merzimde Bostonda (AQSh) Leıver kýbogy da bolady.
«Rolan Garros» – jyl saıyn ótetin tórt «Úlken dýlyǵa» týrnıriniń biri.
Taǵy bir «Úlken dýlyǵa» dodasy – Ýımbldon týrnıri bıylǵy 29 maýsym men 12 shilde aralyǵynda ótedi dep josparlanǵan. Bul jarysty uıymdastyrýshylar ázirge ýaqytyn ózgerte qoıǵan joq. Degenmen olar da barlyq qatysýshylar men qyzmetkerlerdiń, jankúıerlerdiń densaýlyǵy men qaýipsizdigi basty orynda ekendigin, koronavırýsqa baılanysty jaǵdaıdy jiti baqylap otyrǵandyǵyn jetkizdi.
Eske sala keteıik, budan buryn Reseıde barlyq fýtbol jarystarynyń toqtatylǵanyn jazǵan bolatynbyz.
