Koronavırýs: Reseıde jańa antırekord tirkeldi

NUR-SULTAN. QazAqparat – Eýropada koronavırýs boıynsha qaýpi joǵary memleketter tizimi tolyǵý ústinde. Reseıde jańa antırekord tirkeldi. Bul týraly Qazaqstanda COVID-19 taralýyna jol bermeý jónindegi vedomstvoaralyq komıssııanyń Telegram-kanalynda málim etildi, dep habarlaıdy QazAqparat.

Eýropa koronavırýs qaýpi joǵary elder tizimin tolyqtyrýda. Germanııa Rýmynııa men Lıtvany COVID-19 boıynsha qaýipti elder dep jarııalady. Búgingi kúnge deıin EO elderi arasynda «qyzyl» aımaqqa Slovenııa jatqyzylyp kelgen edi. Robert Koh ınstıtýty Belarýsty da joǵary qaýipti aımaqtar qataryna qosty. Bul elderge kiretin azamattar Germanııaǵa vaktsınatsııa sertıfıkatynsyz nemese KVI-den aıyqpaǵan kúıi oralǵan jaǵdaıda, 10 kúndik karantınge jiberiledi. Karantınnen besinshi kúni ǵana teris test nátıjesimen shyǵa alady. Jalpy, búkil álem boıynsha joǵary táýekel tizimine 70-ke jýyq el engizilgen.

Reseı Federatsııasynda koronavırýsqa shaldyǵý jáne ólim-jitim kúrt artty. Resmı málimetterge sáıkes, ótken táýlikte 26 myńǵa jýyq adamǵa COVID-19 dıagnozy qoıyldy, 890 patsıent qaıtys boldy – bul jańa antırekord. Osyǵan baılanysty Reseı óńirleri jańa shekteýler engizýde. Mysaly, Ýfa men Perm ólkesinde QR-kodtar júıesi qaıtadan iske qosylady. Pskovta barlyq sporttyq jáne dinı sharalar toqtatyldy, 65 jastan asqan adamdar úshin ózin-ózi oqshaýlaý mindetti bolyp tabylady. Hanty-Mansıısk avtonomııalyq okrýginde jáne Rostov oblysynda bıýdjettik qyzmetkerler qashyqtan jumys jasaý formatyna aýystyrylady.