Koronavırýs: Reseıde barlyq fýtbol jarystary toqtatyldy
NUR-SULTAN. QazAqparat – Reseı fýtbol odaǵy elde barlyq fýtbol jarystarynyń toqtatylǵanyn jarııa etti, dep habarlaıdy QazAqparat tilshisi.
Búgin Máskeýde Reseı fýtbol odaǵy atqarý komıtetiniń bıýro májilisinde osyndaı sheshim qabyldandy.
Reseı fýtbol odaǵynyń baspasóz qyzmeti málim etkenindeı, koronavırýs juqpasynyń taralý qaýpine baılanysty barlyq fýtbol dodalary bıylǵy 17 naýryzdan 10 sáýirge deıin toqtatyldy. Buǵan Reseı fýtbol odaǵy, sondaı-aq lıgalar, óńirlik fýtbol federatsııalary men olardyń birlestikteri uıymdastyryp, ótkizip júrgen jarystar kiredi.
Aıta keteıik, fýtboldan Reseı premer-lıgasynda óner kórsetetin birneshe klýbta qazaqstandyqtardyń oınaıtyny belgili. «Rostovtyń» namysyn jartylaı qorǵaýshy Baqtıer Zaınýtdınov qorǵasa, bıyl «Orynborǵa» Qazaqstan quramasynyń taǵy bir oıynshysy Islambek Qýat aýysqan bolatyn. Al Akmal Baqtııarov «Sochıde» júr.
