Koronavırýs: Petropavlda qoǵamdyq baqylaý jumysyn toqtatpaıdy
Petropavlda qoǵamdyq baqylaý shilde aıynda, koronavırýs ınfektsııasy órship turǵan kezde quryldy. Onyń úılestirýshisi Oksana Prışıtstiń aıtýynsha, jaǵdaı tezirek qalypqa kelýi úshin, turǵyndardyń ómiri men densaýlyǵyn saqtaý úshin qoǵamdyq baqylaý kóp jumys atqardy.
«Qoǵamdyq baqylaý óńirlerde Aqparat jáne qoǵamdyq damý mınıstrliginiń bastamasymen elde koronavırýs ınfektsııasy sharyqtaý shegine jetip turǵan kezde quryldy. Osy ýaqytqa deıin sybaılas jemqorlyqqa qarsy qyzmetpen, prokýratýra jáne ákimdikpen birge provızorlyq, ınfektsııalyq statsıonarlarǵa reıdter uıymdastyrdyq. Ondaǵy naýqastarǵa jáne mamandarǵa jasalǵan jaǵdaıdy kórdik. Bul ortalyqtarda jumys isteıtin medıtsınalyq qyzmetkerler arasynda ústemeaqynyń tólený-tólenbeýi jaıynda, eńbek jaǵdaıy, tamaqtaný, turý boıynsha jasyryn saýalnama júrgizdik. Dárihanalardy tekserip, dári-dármek baǵasyn, preparattardyń jetkilikti bolýyn baqyladyq», - deıdi Oksana Prışıts.
Oblysqa kelip jatqan gýmanıtarlyq kómek qoǵamdyq baqylaýdyń súzgisinen ótedi. Olar júkti qarsy alyp, tegin taratylýy tıis maska, preparat jáne jeke qorǵanysh buıymdarynyń saýdaǵa túspeýin, maqsatty túrde berilýin qamtamasyz etti.
«Gýmanıtarlyq kómek sybaılas jemqorlyqqa qarsy qyzmet jáne densaýlyq saqtaý basqarmasynyń ókilderimen birge qabyldanyp, óńirdiń emdeý mekemelerine qajetine qaraı taratylyp otyrdy. Qazir de jumys toqtaǵan joq. Karantın talaptarynyń saqtalýyn qadaǵalaımyz. Sonyń ishinde maska taǵý rejıminiń saqtalýyn. Bizge oblystyń bas sanıtarııalyq dárigeriniń qaýlysyn buzǵandar jaıynda habar túsken jaǵdaıda biz birden tıisti oryndardy habardar etemiz. Osy oraıda jedel áreket etetin polıtsııa qyzmetin atap óter edim», - deıdi qoǵamdyq baqylaý úılestirýshisi.
Oksana Prışıtstiń aıtýynsha, SQO-ǵa shilde aıynyń ortasynan bastap osy kúnge deıin 13 ret gýmanıtarlyq júk keldi. Negizinen jeke qorǵanysh quraldary, preparattar, maskalar, qyzýólshegishter Reseıden, AQSh, Qytaı, Túrkııa jáne Ózbekstan elderinen jetkizildi.
