Koronavırýs pandemııasy kezinde qazaqstandyqtar qandaı qıyndyqtarǵa tap boldy

NUR-SULTAN. QazAqparat – Koronavırýs pandemııasy kezinde qazaqstandyqtardyń 58 paıyzy em-dom alýda qıyndyqtarǵa tap boldy. Bul týraly búgin elordada densaýlyq saqtaý salasyndaǵy halyqaralyq zertteýdiń nátıjesin tanystyrý kezinde aıtyldy, dep habarlaıdy QazAqparat tilshisi.

Osy zertteýdi 15 elde STADA farmatsevtıkalyq kompanııasy júrgizgen. Bul zertteý jyl saıyn Eýropanyń elderinde ótkiziletin. Al bıyl osy saýalnamaǵa Qazaqstan da engizildi. Bıyl zertteý aıasynda 30 myńnan astam adam saýalnamaǵa qatysyp, olardyń arasynda eki myńnan astam Qazaqstan azamaty boldy.

«Sońǵy eki jyl ishinde álem elderi densaýlyq saqtaý júıesiniń jumysy qıyndaı tústi. Bul turǵyda qazaqstandyq respondentterdiń 58 paıyzy jáne saýalnamaǵa qatysqan eýropalyqtardyń 57 paıyzy pandemııa kezinde em-dom alýda qıyndyqtarǵa tap bolǵanyn atap ótken. Qazaqstandyqtardyń 30 paıyzy (Eýropa boıynsha ortasha kórsetkish 22%) dárigerge der kezinde jazyla almaǵanyn aıtyp otyr», - delingen zertteý málimetinde.

Sonymen qatar, saýalnama kezinde qamtylǵan Qazaqstan azamattarynyń 28 paıyzy jetkizýdegi irkilisterge baılanysty dárihanada qajetti dári-dármekterdi taba almaǵandaryn atap ótti. Al osy máselede Eýropa boıynsha ortasha kórsetkish 10 paıyzdy qurady.

«Qazaqstan turǵyndarynyń 12 paıyzy jáne eýropalyqtardyń 22 paıyzy aýrýdy juqtyryp alýdan qorqyp, dárigerge barýdy keıinge qaldyrǵan», - delingen zertteý derekterinde.

Munymen qosa, saýalnamaǵa qatysqan Qazaqstan azamattarynyń 68 paıyzy veb-kamera arqyly dáriger keńesin alýǵa kelisetinin atap ótken. Bul óz kezeginde ortasha eýropalyq kórsetkishten (64%) asyp tústi.

Budan buryn habarlanǵandaı, atalǵan zertteý aıasynda Qazaqstan azamattarynyń 61 paıyzy resmı medıtsınaǵa senetinin aıtqan.