Koronavırýs pandemııasy álemdegi esirtki trafıgin tómendetti – BUU

NUR-SULTAN. QazAqparat – Koronavırýs ınfektsııasynyń taralýyna qarsy kúres úshin memleketter qabyldaǵan sharalar esirtki óndirý kólemine áser etti. Bul týraly QazAqparat BUU Jańalyqtar saıtyna silteme jasap habarlaıdy.

Esirtki jáne qylmys jónindegi BUU basqarmasynyń baıandamasynda aıtylǵandaı, álemdegi jaǵdaı esirtki trafıginiń baǵyttaryn ózgertýge ákep soqty.

«Halyqaralyq áýe reısteriniń toqtatylýyna baılanysty sıntetıkalyq esirtkini, atap aıtqanda metamfetamındi zańsyz jetkizý tizbegi úzildi. Esirtki satýshylar kontrabandanyń balamaly baǵyttaryn izdestire bastady, onyń ishinde aǵyny qurlyq arqyly ótetin geroındi de izdeı bastady. Qazir geroındi de kokaın sııaqty teńiz arqyly tasymaldaýǵa tyrysady. Eýropa porttarynda únemi kokaınniń iri partııalary, al Úndi muhıtynyń jaǵalaýyndaǵy elderde geroın men basqa da esirtki túrleri tárkilenedi», - delingen baıandamada .

Geroın men kokaınniń zańsyz jetkizilýiniń azaıýy qara naryqta esirtki tapshylyǵyna alyp keldi. Sarapshylar bul esirtkini tutynýdy azaıtýǵa kómektesedi dep úmittenedi. Biraq ekinshi jaǵynan, olar bul jergilikti deńgeıde óndiriletin basqa zııandy zattarǵa táýeldiliktiń ósýine ákelýi múmkin dep qaýiptenedi.

COVID-19 taralý jaǵdaıynda halyqaralyq saýdanyń tómendeýi sıntetıkalyq esirtki óndirisinde qoldanylatyn prekýrsorlardyń tapshylyǵyna ákelýi múmkin.