Koronavırýs: Ózbekstanda bir táýlikte 80 myńǵa jýyq adamǵa ekpe salyndy
TAShKENT. ÓzA – QazAqparat - Ózbekstanda 1 sáýirden bastalǵan halyqty jappaı vaktsınatsııalaý naýqany aıasynda jalpy 797 781 azamatqa ekpe jasaldy. Bul týraly QazAqparat ÓzA silteme jasap habarlaıdy.
Ózbekstannyń Densaýlyq saqtaý mınıstrligi qoǵammen baılanys departamentiniń habarlaýynsha, ótken táýlikte 79 310 adamǵa ekpe jasalǵan. Bul vaktsına bastalǵaly kúndik eń joǵary rekordty kórsetkish.
1 aılyq qorytyndyǵa saı aımaqtar arasynda eń kóp vaktsına alǵandar Ferǵana oblysynda (117 843 adam). Keıingi kezekte Namangan (84 874), Ándijan (82 268) oblystary tur.
Aıta ketsek, qazirgi ýaqytta el aýmaǵynda úsh túrli vaktsına («Spýtnık V», «AstraZeneca» jáne ózbek-qytaı «ZF-UZ-VAC 2001» vaktsınasy) azamattarǵa egilýde.
1 sáýirde bastalǵan vaktsınatsııa naýqany boıynsha 3 aıda 4 mln turǵyndy vaktsınalaý josparlanǵan.
