Koronavırýs: Óskemende jańa statsıonar ashylady
ÓSKEMEN. QazAqparat – Óskemen qalasynda bıylǵy qazan aıynda juqpaly aýrýlar bólimshesi ashylady, dep habarlaıdy QazAqparat tilshisi.
Koronavırýs pandemııasy burynǵy medıtsınalyq jedel járdem aýrýhanasynyń ǵımaratyn kúrdeli jóndeýdi tezirek aıaqtaýǵa májbúr etti. Búginde mekemege plastıkalyq terezeler men esikter qoıylǵan. Elektrmen jabdyqtaý 95% aıaqtalsa, jeldetkish qubyrlar 75% ornatyldy.
«Jóndeýdi tez ári sapaly aıaqtaý óte mańyzdy. Lınoleým tóseý, jabdyqtardy jetkizip, iske qosý, sondaı-aq ǵımarattyń syrtyn árleý jumystary qaldy», - dedi Shyǵys Qazaqstan oblysynyń ákimi Danıal Ahmetov.
Tórtinshi qalalyq aýrýhana fılıalynyń artyqshylyǵy keń zertteýlerge arnalǵan PTR zerthanalar bolmaq. Sonymen qatar bul aýrýhana jyljymaly rentgen apparattarymen jáne kompıýterlik tomografııamen jabdyqtalady. Aýyr naýqastar úshin 15 tósekke arnalǵan reanımatsııa bólimi daıyndalyp, onda ókpeni jasandy jeldetý apparattary bolady.
Pandemııa aıaqtalǵannan keıin statsıonar Shyǵys Qazaqstan oblysynyń tynys alý organdaryn emdeýge arnalǵan ortalyqqa aınalmaq.
Esterińizge sala ketsek, osyǵan deıin ShQO-da juqpaly indettiń ekinshi tolqynyna daıyndalý maqsatynda 7069 tósek-oryn daıyndalǵany habarlandy.
